Dalgħodu ġiet imedija l-politika tal-homework, bil-għan li t-tfal ma jqattgħux ħin “esaġerat,” jaħdmu fuq ix-xogħol mogħti mill-għalliema wara l-iskola.
L-għan tal-politika hu li jkunu stabbiliti ħinijiet ta’ kemm it-tfal għandhom idumu jagħmlu l-homework.
Il-ħinijiet huma dawn:
- Kindergarten: bla homework
- Year 1-2: Massimu ta’ 20 minuta kuljum
- Year 3-6: Massimu ta’ 30 minuta kuljum
- Year 7-8: Masssimu ta’ siegħa kuljum
- Year 9-11: Massimu ta’ tmien sigħat fil-ġimgħa
Waqt it-tnedija, li saret fl-iskola primarja tan-Naxxar, uħud mit-tfal ingħataw iċ-ċans li jiddiskutu u jgħidu x’inhi l-viżjoni tagħhom mal-Ministru Evarist Bartolo.
Kien hemm minn qabel li l-homework huwa importanti, iżda oħrajn jippreferu jistudjaw jew jaqraw milli jagħmlu l-homework. Kien hemm uħud li qalu li ħafna homework ma jħallilhomx biżżejjed ċans biex jagħmlu affarijiet oħra li jħobbu.
Min-naħa tiegħu l-Ministru tkellem dwar l-importanza tal-ħin liberu u li l-istudenti jkollhom ċans jagħmlu dawk l-affarijiet li jħobbu.
Qabel ma kienet imnedija l-politika, saret riċerka fost l-għalliema, il-ġenituri u l-istudenti u l-esperjenzi tagħhom. L-għan huwa li jinħoloq bilanċ bejn l-istudju u l-ħin liberu.
“Inqas homework ma għandux ifisser aktar televixin jew video games,” saħaq il-Ministru waqt li tkellem fuq l-importanza tal-attivitajiet diversi u anke l-qari.
Preżenti kien hemm ukoll is-Segretarju Parlamentari għaż-Żgħażagħ, Clifton Grima.
