'Kulħadd għandu jirrispondi għall-għemil tiegħu' - Chris Fearne

Id-Deputat Prim Ministru u Ministru għas-Saħħa Chris Fearne qal li kulħadd għandu jirrispondi għall-għemil tiegħu u insista li ħadd mhu akbar mill-pajjiż jew mill-partit.

Fearne qal dan lill-ġurnalisti huwa u dieħel Kastilja għal-laqgħa tal-Grupp Parlamentari tal-Partit Laburista.

Waqt li insista li l-Prim Ministru Joseph Muscat għandu l-fiduċja tal-Grupp Parlamentari kollu kemm hu, saħaq li l-Gvern u l-Partit Laburista qatt ma beża' jieħu deċiżjonijiet.

Fil-fatt, żvela kif apparti l-laqgħa tal-Grupp Parlamentari, il-Partit Laburista se jkun qiegħed ilaqqa' wkoll l-Eżekuttiv tiegħu.

Filwaqt li saħaq li l-qtil ta' Daphne Caruana Galizia għamel ħsara kbira lir-reputazzjoni tal-pajjiż, insista li l-Gvern huwa determinat li jsewwi l-ħsara li saret waqt li tenna li din għandha tkun il-prijorità bħalissa.

Mistoqsi jekk hux imħasseb dwar is-sitwazzjoni, jekk Konrad Mizzi u Keith Schembri għadhomx jirriżenjaw u jekk hu jħossx li għandu dmir jitkellem bħala Deputat Prim Ministri, Fearne saħaq li hu jitkellem fil-laqgħa tal-Grupp Parlamentari.

Ara wkoll:

• Filmat | Keith Schembri jidher għall-ewwel darba wara l-arrest ta' Fenech; Fommu sieket
• Il-Ministru Bartolo ċar u tond ... Jitlob lil Konrad Mizzi u lil Keith Schembri biex iwarrbu
• Konrad iwieġeb lil Evarist: 'Attakki bħal dawn ipaxxu lill-PN'