Aktar kmieni llum il-Qorti tal-Appell laqgħet l-appell imressaq mill-Kunsill Lokali tas-Siġġiewi dwar il-permess (outline development permit) biex jinbnew 12-il razzett tal-baqar viċin id-Dar tal-Providenza fis-Siġġiewi. Fis-sentenza tagħha l-Qorti qalet li d-deċiżjoni li ħa t-Tribunal ta’ Reviżjoni tal-Ambjent u l-Ippjanar kienet żbaljata meta ma kkunsidrax kif suppost l-argumenti li ressaq il-Kunsill Lokali dwar is-sit magħżul mill-Gvern u s-siti alternattivi.
B'żieda mad-deċiżjoni tal-Qorti tal-Appell, il-Kunsill Lokali tas-Siġġiewi għamilha ċara li llum-il ġurnata ma jeżisti l-ebda permess validu biex il-Gvern jkun jista’ jibni dawn l-irziezet viċin id-Dar tal-Providenza għaliex il-Gvern ma applikax fiż-żmien indikat fil-permess stess u ċjoè sad-9 ta' Awwissu 2016.
Is-Sindku tas-Siġġiewi Karol Aquilina qal: “Wara snin ta’ ħidma mill-Kunsill Lokali tas-Siġġiewi kontra dan l-iżvilupp, illum l-Qorti tal-Appell tatna raġun. Minħabba f'hekk kif ukoll minħabba l-fatt li l-permess ilu aktar minn xahrejn li skada, illum nistgħu ngħidu li z-zona ta’ San Niklaw ġiet salvata minn żvilupp li ma jaqbel xejn ma’ din iz-zona tant viċin id-Dar tal-Providenza. Għalhekk qiegħed nappella lill-Gvern biex ġaladarba skada l-permess li kellu f’idejh, issa flimkien mal-Kunsill Lokali u mad-Dar tal-Providenza, nagħmlu sforz kollettiv biex iz-zona tad-Dar tal-Providenza tingħata status ta’ ħarsien speċjali”.
Il-Kunsill Lokali tas-Siġġiewi kien sa mill-bidu nett li ġiet ippreżentata din l-applikazzjoni fis-sena 2006, b’mod unanimu ressaq oġġezzjonijiet qawwija għal dan il-proġett tal-Gvern.
F’dawn il-proċeduri l-Kunsill Lokali tas-Siġġiewi kien assistit mill-Perit Carmel Cacopardo u mill-Avukat Carl Grech.
![[BIL-FILMAT] Il-Ministru tal-Ġustizzja jagħti ħjiel li ċ-ċittadini se jkollhom jitolbu investigazzjoni tal-pulizija qabel inkjesta maġisterjali](http://content.illum.com.mt/ui_frontend/thumbnail/684/0/whatsapp_image_2025-01-20_at_17.01.58.jpeg)
