L-Għaqda Patrijotti Maltin tinsab ferm irrabjata għall-Isqof Charles J Scicluna kif ukoll għall-Isqof t'Għawdex Mario Grech wara li talbiet għall-laqgħat, skont l-stess Patrijotti, waqgħu fuq widnejn torox. Huma akkużaw lill-mexxejja tal-Knsija b'interdett u li qed tibni l-ħitan minflok il-pontijiet.
Fi stqarrija l-Għaqda, li se tkun qed tikkontesta l-elezzjoni li jmiss, qalet illi staqsiet 'biex tiltaqa mal-Isqfijiet biex tiddiskuti 'd-deficit morali u soċjali preżenti' u u biex il-knisja tapprova mexxejja spiritwali għall-istess Għaqda.
Filwaqt li qalu kif baqgħu bla risposta għal ġimgħat sħaħ akkużaw lill-Isqfijiet illi minflok pont qed jibni ħitan. 'Hija ħasra li l-istorja qegħda tirrepeti ruħha bil-Knisja tagħżel li tmur lura għall-1961, billi tinterdettja partit politiku,' sostniet l-Għaqda li qalet ukoll li qed taqbeż għall-ħaddiema minn dik li sejħet bħala 'invażjoni'.
'Nittamaw li dan l-interdett ma jgħoddx ukoll għall-eluf ta membri tal-Ghaqda u l-Moviment, fil-maġġoranza kbira tagħhom insara,' temmet tgħid l-istqarrija.
Il-bibien tal-knisja miftuħin għal kulħadd...
Intant fi stqarrija il-Knisja esprimiet d-diżappunt tagħha għal dak li allegaw il-Patrijotti, 'u għall-konklużjonijiet li waslu għalihom. Il-Knisja, filwaqt li tinkoraġixxi u tħeġġeġ lill-politiċi Insara jipprattikaw it-tagħlim Nisrani, tfakkar li mhix il-prattika pastorali tagħha li taħtar saċerdot bħala diretturi spiritwali ta’ xi moviment politiku.'
Fl-istqarrija tagħha l-Knisja fakkret illi l-bibien tal-Knisja jibqgħu miftuħin 'għal dawk kollha, inkluż politiċi, li jixtiequ javviċinaw saċerdot bħala gwida għat-tagħlim tal-Knisja fuq il-ġustizzja soċjali.'
