Il-Prim Ministru ta’ Malta Robert Abela ħa pożizzjoni simili ta’ dik ta’ Trump fejn qal li hija impossibbli li l-gwerra fl-Ukrajna tintemm mingħajr “kompromessi.” Barra minn hekk, qal ukoll li flus mill-Unjoni Ewropea (UE) għandhom jieqfu jmorru għax-xiri ta’ armi u armamenti biex jintużaw fil-gwerer.
“Nittama li l-UE ma toqgħodx issabbat saqajha u tinsisti li l-unika mod kif tispiċċa l-gwerra hija billi terbaħha l-Ukrajna,” qal Abela. “Ejja nkunu realistiċi: naħseb din qatt mhu se tiġri.”
Abela kompla billi jgħid li n-newtralità u n-nuqqas t’allinjament ma’ naħa jew oħra ta’ Malta m’għandhomx jintmessu u li dawn jistgħu jservu ta’ vantaġġ meta l-pajjiż jippromwovi l-paċi. Qal hekk b’referenza għal-laqgħa straordinarja tal-mexxejja Ewropew li ħa ssir Brussell nhar il-Ħamis li ġej.
Fil-fatt, is-Sibt li għadda l-Ministru tal-Affarijiet Barranin Ian Borg qal li Malta hija lesta biex tkun spazju għal taħdidiet ta’ paċi bejn l-Istati Unit, l-Ewropa u l-alleati.
Il-Prim Ministru kompla billi jgħid, “xi wħud qed jgħidu li l-gwerra tista’ tintemm biss jekk terbaħ l-Ukrajna u b’hekk l-UE għandha tagħmel li tista’ u tibqa’ tonfoq biljuni t’ewro fuq l-armi. Jien qatt m’emmint li din hija possibbli, u nemminha inqas issa.”
Minflok, il-flus għandhom jintnefqu fuq in-nies. Barra minn hekk, Abela saħaq li l-gwerra ma tistax tintemm mingħajr l-intervent tal-Amerka.
Abela kien qed jitkellem waqt intervista l-Ħadd filgħodu, fejn barra s-suġġett tal-gwerra tal-Ukrajna, tkellem dwar it-tibdiliet fil-liġi tal-inkjesti maġisterjali u s-serqa tad-drogi mill-AFM li ġrat riċentament.
