Reazzjonijiet qawwija kontra r-riforma tal-inkjesti maġisterjali

Il-Parlament Malti għadda r-riforma kontroversjali dwar l-inkjesti maġisterjali, magħrufa bħala l-Abbozz Nru 125, minkejja l-oppożizzjoni qawwija minn diversi entitajiet u partiti. Il-votazzjoni, li saret fost protesti quddiem il-Parlament, rat lill-Gvern Laburista jivvota b’37 vot favur u l-Oppożizzjoni tgħid le b’30 vot kontra. Issa, l-mod kif iċ-ċittadini jistgħu jitolbu inkjesta maġisterjali nbidel radikalment, b’aktar ostakli biex l-abbuż u l-korruzzjoni jiġu investigati.

Reazzjonijiet qawwija

Wara li l-abbozz inbidel f’liġi, diversi entitajiet esprimew id-diżapprovazzjoni tagħhom. Il-Partit Nazzjonalista, ADPD – The Green Party, u l-għaqda Repubblika kollha kienu qawwijin fil-kritika tagħhom, jgħidu li din il-liġi hija tentattiv ċar biex il-Gvern jipproteġi lilu nnifsu u lil min għandu qrib.

Il-Partit Nazzjonalista: “Se jiddeċiedi l-poplu fil-vot li jmiss”

Ritratt: Partit Nazzjonalista

Il-Kap tal-PN Bernard Grech ikkundanna bil-qawwa dan il-pass tal-Gvern, jgħid li din il-liġi qed tagħmel ħsara diretta lid-demokrazija Maltija. Huwa saħaq li din ir-riforma tnaqqas is-setgħa taċ-ċittadini li jitolbu ġustizzja, u li fl-elezzjoni ġenerali li jmiss, il-poplu jkollu l-opportunità li jerġa’ jikseb lura dak li ġie misruq bil-votazzjoni fil-Parlament.

Il-Partit Nazzjonalista esprima l-oppożizzjoni tiegħu għat-tibdil fil-liġi sa mill-bidu nett, u vvota kontra l-abbozz tliet darbiet. Skont il-PN, l-uniku mod kif il-poplu jista’ jerġa’ jikseb id-dritt tiegħu li jitlob investigazzjonijiet fuq politiċi huwa billi jagħmel il-bidla permezz tal-elezzjoni ġenerali li jmiss.

ADPD – The Green Party: “Attakk fuq is-saltna tad-dritt”

Ritratt: ADPD

ADPD saħqet li din il-liġi hija riflessjoni ta’ Gvern li qed jaħbi, li jrid jibqa’ ’l bogħod mill-iskrutinju. Skont Sandra Gauci u Ralph Cassar, il-Gvern għażel li jimmina t-trasparenza u l-kontabbiltà, bl-istess mod kif il-Gvernijiet ta’ qabel kienu ppruvaw jagħmlu. “L-abbuż tal-poter se jkompli jikber, u dan se jwassal għal aktar korruzzjoni,” saħqu l-esponenti tal-partit.

Skont is-Segretarju Ġenerali ta' ADPD, Dr. Ralph Cassar, il-vot ta' llum min-naħa tal-Membri Parlamentari Laburisti wera li l-Partit Laburista għażel li jnaqqas il-possibilitajiet taċ-ċittadini li jiġġieldu l-korruzzjoni. Huma sostnew li dan juri kif il-Gvern Laburista qed isostni l-korruzzjoni, li, f’mumenti oħra, hija normalizzata fil-pajjiż.

Ir-reazzjoni ta' Repubblika 

Ritratt: Occupy Justice Malta/Facebook

Skont Repubblika, il-Gvern ta’ Robert Abela u Jonathan Attard neħħa d-dritt taċ-ċittadini li jitolbu inkjesti maġisterjali biex jiġu investigati każijiet ta’ abbuż u korruzzjoni. Huma jsostnu li dan sar biex jiġu protetti individwi li jistgħu jkunu involuti f’prattiċi korrotti. L-organizzazzjoni tgħid ukoll li din il-liġi tista’ tkun f’kunflitt mal-Kostituzzjoni Maltija.

Repubblika ddikjarat li hija temmen li din il-liġi tmur kontra l-Kostituzzjoni u għalhekk se tressaq kawża Kostituzzjonali biex tissfidaha fil-Qorti. L-organizzazzjoni tgħid li dan mhux biss pass biex il-liġi tiġi ddikjarata nulla, iżda wkoll biex iċ-ċittadini jirkupraw dritt li, skont huma, ġie mneħħi mingħandhom.

Repubblika saħqet li minkejja li l-Gvern ma riedx jisma’ l-opinjoni tagħhom matul il-proċess, huma se jkomplu jiġġieldu l-każ tagħhom fil-Qorti.