Fuq il-ħarġa tal-Ħadd 7 ta' Awwissu, l-ILLUM qasmet mall-qarrejja storja reali u ta' qsim il-qalb ta' mara li qegħda tipprova tgħajjex lill-ulieda taħt kundizzjonijiet soċjali mill-aktar iebsin, f'dar ikkundannata bis-saqaf se jaqa' u ma jaqax fuq rasha u ras uliedha.
L-istorja ġibdet l-attenzjoni ta' ħafna qarrejja li forsi ħafna minnhom lanqas kienu jimmaġinaw li fil-ġurnata tal-llum f'pajjiżna, għad jista' jkun hawn nies li qegħdin jgħixu f'din ir-realtà diffiċli. Minbarra l-ammont ta' messaġġi u kummenti li rċeviet din il-gazzetta dwar l-istorja, konna tassew kuntenti naraw post fuq il-paġna facebook tal-grupp 'Alleanza kontra l-faqar', li bi spunt mir-rapport tal-ILLUM, ħadu l-inizjattiva biex jappellaw għall-qalb tajba tal-poplu Malti sabiex jinġabru donazzjonijiet għall-din il-mara kuraġġuża u fil-bżonn.
Fuq il-paġna ta' facebook tagħhom, Alleanza kontra l-faqar għamlu appell sabiex jinġabru donazzjonijiet għall-omm li kitbet fuqha l-ILLUM, filwaqt li kitbu li...
"Omm ta' erbat itfal għandha xewqa li teħodhom ġurnata Għawdex. Għal ħafna nies mhix ħaġa kbira, imma għal din l-omm, li lanqas għandha fejn toqgħod, u tgħix fil-faqar, mhix possibli lanqas li tieħu ġurnata mistrieh sura.
Għalhekk l-Alleanza tappella għall-ġenerozità, biex mhux biss ngħinu lil din l-omm taqta' xewqitha u tikkuntenta lil uliedha imma anke nagħmlulha xirja. L-ghan taghna huwa li niġbru 300 ewro.
Kull donazzjoni, żgħira kemm hi żgħira tkun apprezzata.
Ibghat cekk lill-Alleanza kontra l-Faqar, c/o 5, Sqaq Nru 2, Triq il-Kbira, Naxxar NXR 182,
jew għamel depożitu fil-kont tal-AKF: BOV Bank Account Number 40021952508.
