Studju tal-VIA jindika impatt negleġibbli fuq il-kwalità tal-arja

Studju ġdid tal-Valutazzjoni tal-Impatt Ambjentali (VIA) kkonkluda li l-emissjonijiet mill-inċineratur propost għar-rimi ta’ skart perikoluż fil- Magħtab se jkollhom impatt negliġibbli fuq il-kwalità tal-arja.

L-istudju sab li l-emissjonijiet mill-impjant fil-kumpless tal-Ecohive huma mistennija jibqgħu fi ħdan il-limiti regolatorji taħt kull xenarju ttestjat.

Il-faċilità termali l-ġdida qed tiġi proposta fuq seba’ għelieqi agrikoli li jkopru madwar 18,200 metru kwadru, lejn il-Lvant tal-miżbliet tal- Magħtab u Għallis.

Sostituzzjoni tal-Impjant eżistenti f’Marsa

Il-proġett huwa maħsub biex jieħu post il-faċilità attwali ta’ Trattament Termali fil Marsa, u se jipproċessa volumi ħafna akbar ta’ skart. Huwa mistenni li l-ipproċessar tal-iskart perikoluż jaqbeż l-10,000 tunnellata kull sena sal-2045. Il-faċilità attwali f’Marsa, mibnija fl-2007, kienet oriġinarjament iddisinjata għall- iskart tal-annimali iżda issa qed tiffaċċja limitazzjonijiet ta’ kapaċità. Bħalissa tipproċessa bejn 5,000 u 6,000 tunnellata ta’ skart perikoluż kull sena, b’130 sa 150 vjaġġ ta’ trasport fil-ġimgħa. Minħabba raġunijiet ekonomiċi u operattivi, it-titjib tal-faċilità eżistenti ġie kkunsidrat mhux vijabbli meta mqabbel mal-kostruzzjoni ta’ impjant ġdid u modern fil- Magħtab.

Il-faċilità l-ġdida se tipproċessa varjetà wiesgħa ta’ flussi ta’ skart, inklużi karkassi, skart kliniku, żjut skaduti, prodotti sussidjarji tal-biċċerija, u kimiċi industrijali. Fil-bidu, se tkun operattiva linja waħda ta’ proċessar, b’provvediment għal tieni linja biex takkomoda domanda futura. Kull linja hija ddisinjata biex timmaniġġja sa 1.2 tunnellata ta’ skart kull siegħa, li tippermetti kapaċità totali ta’ 7,000 tunnellata għal kull linja fis-sena.

Impatt negliġibbli fuq il-kwalità tal-arja

Wieħed mill-aktar tħassibiet ewlenin imsemmija fil-VIA huwa l-impatt potenzjali tal-emissjonijiet tal-faċilità fuq il-kwalità tal-arja. Eżerċizzju ta’ monitoraġġ tal-arja li dam sitt ġimgħat identifika 55 punt ta’ riċeviment fil-Magħtab, in-Naxxar, Pembroke, is-Swieqi, San Pawl il-Baħar, San Ġwann, u l-Mosta.

Tliet mudelli ta’ kwalità tal-arja ġew ittestjati biex jissimulaw xenarji operazzjonali differenti, inkluż l-agħar każ ta’ emissjonijiet. L-istudju inkluda l-użu ta’ sistemi ta’ Trattament tal-Gassijiet tal-Fwar (FGT) u Sistemi ta’ Monitoraġġ Kontinwu tal-Emissjonijiet (CEMS) biex jirregolaw u jimmonitorjaw l-emissjonijiet.

Ir-riżultati juru li l-emissjonijiet tad-dijossidu tan-nitroġenu (NO₂), materja partikulata (PM₁₀ u PM₂.₅), u inkwinanti oħra mistennija jibqgħu fi ħdan il-limiti regolatorji skont id-Direttiva 2008/50/KE dwar Kwalità tal-Arja Ambjentali u Arja Iktar Nadifa għall-Ewropa.
L-istudju kien ibbażat fuq għoli ta’ 25 metru ta’ ċumnija, wara studju preċedenti li kkumpara tliet qisien differenti tal-ċmieni – 25m, 30m, u 35m.

L-istudju wera li ma kien hemm l-ebda varjazzjoni sinifikanti fl-impatt fuq il-kwalità tal-arja fost l-għoli differenti, u għalhekk ġie deċiż li tiġi adottata ċumnija iqsar biex jitnaqqas l-impatt viżiv u l-ispejjeż relatati.

Madankollu, valutazzjoni tal-impatt kumulattiv li kkunsidrat l-emissjonijiet kemm mill-faċilità l-ġdida kif ukoll mill-impjant tal-Waste-to-Energy (WtE) viċin, indikat żieda żgħira fil-konċentrazzjonijiet tal-PM₁₀ f’punt ta’ riċeviment fuq art agrikola 0.43 km mill-post. Din iż-żieda x’aktarx ma taqbiżx il-limiti aċċettabbli iżda se tibqa’ tiġi mmonitorjata.

Il-ħoss mhux mistenni li jkun ta’ tħassib maġġuri matul il-fażijiet tal-kostruzzjoni jew operattivi tal-proġett.