Il-Kamra tal-Periti ħabbret li l-kunsill tagħha fetaħ investigazzjonijiet dwar inċidenti li ġew rappurtati f’siti ta’ kostruzzjoni f’Tas-Sliema u fiż-żona industrijali ta’ Bulebel.
L-inċident ta’ Tas-Sliema, fejn l-Awtorità tal-Bini u l-Kostruzzjoni waqqfet ix-xogħlijiet ta’ kostruzzjoni fuq proġett ta’ lukanda mmexxi mill-president tal-Malta Developers Association Michael Stivala wara li xogħlijiet ta’ demolizzjoni ħallew toqba kbira f’appartament residenzjali biswit. Ix-xogħlijiet f’Tas-Sliema fuq il-lukanda ta’ Stivala ġew sospiżi wara ħsara lill-binja oħra.
Ix-xogħlijiet f’Bulebel ġew enfasizzati mid-Deputat tal-Partit Nazzjonalista Mark Anthony Sammut, li qasam ritratti ta’ dak li ddeskriva bħala “xogħlijiet bla rażan” li qal li jfakkru lin-nies fiċ-ċirkostanzi li wasslu għall-mewt ta’ Jean Paul Sofia.
Fi stqarrija tagħha, il-KTP qalet li investigazzjonijiet bħal dawn huma proċeduri standard għall-kunsill tagħha, iżda żiedet tgħid li ħasset il-ħtieġa li tiżvela li dawn infetħu minħabba l-interess pubbliku li qam.
Hija qalet li l-iskop tal-investigazzjonijiet “huwa li jiġi stabbilit jekk kienx hemm nuqqasijiet professjonali minn detenturi ta’ warrant involuti fil-proġetti,” u saħqet li l-ftuħ ta’ investigazzjoni waħdu ma jikkonkludix bħala nuqqas ta’ proffessjonalita’ fuq ix-xogħol.
