Ħassejtni kburi li kont preżenti fi spettaklu bla kuluri

Forsi għax bħalissa qed inqatta esperjenza barra pajjiżi, forsi għax nemozzjona ruħi malajr jew inkella għax vera għandi biex inkun kburi li jien ċittadin ta’ din in-naqra gżira fil-Mediterran. Din il-ġimgħa kont mistieden biex nattendi fit-teatru mill-isbaħ b’akustika eċċezzjonali tal-Bozar fi Brussell, għal kunċert li kellu jtella s-siparju fuq il-Presidenza Maltija.

Mort bi ħġari bħalma kont mort nkanta l-kanzunetta ‘IVA għall-Ewropa’, għax għal darb’oħra ridt inkun parti mill-istorja ta’ pajjiżi. Pajjiż ċkejken bi storja kbira. Pajjiż li fil-qoxra jidher pajjiż maqsum b’żewl kuluri iżda fil-verita hu pajjiż magħqud taħt l-istess bandiera u bl-istess lingwa waħda – il-MALTI.  Xi ħaġa ‘plus’ li għandna fuq il-Belġju. Għax L-ironija hi li ftaħna l-presidenza f’pajjiż li m’għandux lingwa uffiċċjali għax il-Belġjani għandhom tliet lingwi uffiċċjali, Olandiż (Flemish), Franċiż u anke Ġermaniż iżda lingwa tagħhom m’għandhomx. Hemmhekk ma mortx liebes xi kappel ta’ xi kulur partikolari iżda mort bla kappell, mort bħala Malti li inzertajt kont mistieden bħala ‘guest’ tal-partner tiegħi u mhux bħala ‘John Busuttil’.

Din il-gżira ċkejkna, MALTA, illum qed tissemma mal-ewropa kollha u anke lil hinn minnha. Mertu tal-politiċi tagħna sew dawk li ġġieldu biex jagħmluna parti mill-Ewropa kif ukoll dawk li komplew jaqdfu fuq ta’ qabilhom. Ilkoll għamluna kburin li aħna Ewropej u jien kburi mhux biss li jien Ewropew iżda wkoll għax jien Malti bla ma nħares lejn kuluri f’każi bħal dawn. Il-President Marie Louise Coleiro Preca u l-Prim Ministru Joseph Muscat li kienu fil-kaxxa tal-VIP fil-Bozar ma ħassejtx li kienu qed jirrapreżentaw xi moviment partikolari iżda lil poplu Malti kollu.

Dawk preżenti fit-teatru, anke jekk maġġoranza kienet ġejja min-naħa tal-kulur aħmar, xorta tfaċċaw personalitajiet, familjari u uffiċċjali li jaħdmu fl-istituzzjonijiet Ewropej fi Brussell mill-kamp tal-Blu. Għax il-presidenza hi ta’ kulħadd u nerġa ntenni la tal-partit laburista u lanqas tal-partit nazzjonalista, għalkemm wieħed irid jammetti li waslet sal-lum għax il-kamp tal-Blue emmen fiha mill-bidu.

Iżda bla dubju apparti l-kbarat u vip’s li kien hemm preżenti bħal Ministru Louis Grech, il-Ministru Scicluna, Il-ministru Chris Cardona, il-Ministru Owen Bonnici, is-segretarju Parlamentari Ian Borg, l-ambaxxatur għal Malta fil-Belġju Ray Azzopardi, L-ambaxxatriċi u r-rappreżentanta Permanenti tal-Unjoni Ewropea, Marlene Bonnici, il-kummissarju ewropew Karmenu Vella u l-membru tal-Unjoni ewropea fil-qorti tal-awdituri Leo Brincat u uffiċċjali għolja tal-gvern malti, kien hemm anke ħaddiema fi Brussell u taċ-ċivil, ħomor u blu u forsi xi aħdar li ma rajtux.

Jibqa fatt li dawn il-VIP’s kollha maltin u d-dinjitarji barranin li kienu mistiedna ma kinux dawk li ġagħluni nħossni kburi li jien Malti, iżda kien it-tenur Joseph Calleja u l-klassi kbira tiegħu, il-maestro Brian Schembri bli stil inimitabbli tiegħu kif jidderieġi l-orkestra u l-membri kollha tal-orkestra filarmonika Maltija li wieħed irid jammetti li l-livell tagħhom hu ‘state of the art’.

Qabel il-kunċert kien hemm dak li suppost jissejjah reception li jkolli nammetti li malli wasalt jien xi siegħa wara li kien beda ma sibt xejn, la xi nnaqqar u lanqas tazza xampanja għax qaluli li spiċċa. Kemm kien hemm qabel ma nafx iżda naf li bqajt bil-għatx u bil-ġuħ. Ftit diżżappuntat li iddeċidejt li nsum minħabba din ir-reception u spiċċajt sajjem aktar milli kont.

Li ma kontx naf kien li l-‘main course’ ta’ din is-serata ma kellux ikun l-ikel u x-xorb iżda l-kunċert innifsu. U hawn fejn il0-kritika tiegħi tinbidel fi ftaħir lejn min organizza dan il-kunċert fuq dan il-livell. Għax mad-daqq tal-innu Malti mħallat mal-innu tal-Ewropa mill-orkestra Maltija kont diġa nsejt l-istonku vojt.

Imbagħad xi ngħidu għar-ripertorju vast ta’ Joseph Calleja li kanta bit-Taljan, Ġermaniż, Spanjol, Franċiż u anke Malti. Ripertorju li jqabbiżlek id-dmugħ meta tara daqstant dinjitarji barranin jgħajtu ‘BRAVO’ u jqumu bil-wieqfa japplawdu lil dan it-talent kbir Malti li kien kapaċi jgħaddilhom il-messaġġi li ried jgħaddi bil-lingwa Franċiża li niżlet tant tajjeb magħhom anke jekk għalija ma fhimt xejn u applawdejt xorta.

Iżda ma jkunx ġust jekk infaħħar biss il-wirja ta’ Joseph Calleja meta jakkumpanjawh kien hemm l-orkestra b’ħoss eċċezzjonali li tħossha tkellmek, immexxija b’mod uniku mill-bravu Brian Schembri li għadni niftakru fuq il-ġurnali Maltin ħafna snin ilu meta kien daqsxejn ta’ tfajjel li kien mar jdoqq il-pjanu u jistudja l-mużika fl-akkademja tal-mużika tal-Unjoni Sovjetika fi Kiev u Moska dak iż-żmien. Għalkemm jiddispjaċini li ma nistax insemmi l-membri kollha tal-orkestra li kull wieħed u waħda minnhom urew il-klassi tagħhom individwali mnissġa f’orkestra waħda. Anke dawn ġew applawditi bil-kbir minn dawk kollha preżenti u sagħtejn għaddew qas naf kif.

Serata li ntemmet bl-innu Malti għal darb’oħra fejn hemm aktar minn qabel ħassejtni tant kburi li jien Malti u li kont parti mill-istorja ta’ Malta. Storja mnissġa minn politiċi li qbilna jew ma qbilniex magħhom, li ntefa t-tajn fuqhom jew le, jibqa fatt li bis-saħħa ta’ kull wieħed u waħda minnhom dak il-ħin stajt inħossni kburi. Bħalma ħassejtni meta ħadna l-Indipendenza, meta sirna Repubblika, meta ħlisna mill-barrani, meta issilitna biex dħalna fl-Ewropa, meta bdilt il-lira tiegħi għal dik tal-Ewro u llum li nifforma parti minn ġens li qiegħed fit-tmun tal-Ewropa. Dawk il-mijiet li kienu preżenti bil-prim ministru, president, u tant ministri u kbarat jagħmlu parti mill-ġens tiegħi. Naqbel jew ma naqbilx magħhom, ingerger jew infaħħarhom jibqa fatt li huma maltin bħali u bħalek.

Għax jien u int li qed taqrani u missirjietna kollha ħdimna biex illum ninsabu hawn fejn jixirqilna. U dan grazzi għal dawk il-blu u l-ħomor u forsi anke ħodor li f’avvenimenti bħal dawn jinbidlu fil-kuluri tal-bandiera tagħna bajda u ħamra.

Forsi nidher ftit patrijottiku żżejjed illum, forsi wkoll nerġa ntenni għax bħalissa nieqes minn dik il-blata li tant ingerger meta nkun fuqha u tant qed nimmissjaha li qiegħed imbiegħed minnha, iżda ktibt hawn dak li vera ħassejt u nħoss.

VIVA MALTA u l-MALTIN KOLLHA TA KULL KULUR