Il-Parlament Ewropew b'miri biex jiżdiedu n-nisa f'karigi għolja fi ħdanu

Il-Parlament Ewropew (PE) permezz tal-European Parliament Bureau approva roadmap ta' sentejn sabiex jintlaħqu l-miri illi 50% tal-pożizzjonijiet maniġerjali medji jkunu mimlijin minn nisa, filwaqt li 40% tal-pożizzjonijiet maniġerjali għoljin jkunu mimlijin minn nisa f'dak kollu li jirrigwarda Presidenti, Viċi Presidenti u kwesturi tal-Parlament innifsu. Bħalissa f'din l-istituzzjoni huma 39% tal-maniġers fi grad medju li huma nisa u 23% tal-maniġers fi grad għoli li huma nisa. 

Dimitros Papadimoulis, il-Viċi President tal-Grupp tal-PE dwar l-Ugwaljanza tal-Ġeneru u d-Diversità esprima sodisfazzjon li dan il-pjan kien approvat b'mod unanimu.   Huwa qal illi dan il-pjan huwa opportunità sabiex il-PE jsir istituzzjoni fuq materji relatati mal-ġeneru u sabiex l-istess parlament ikun "verament rappreżentattiv u aċċessibbli."

Il-Parlament Ewropew qed jikkommetti lilu nnifsu illi jsaħħaħ l-impatt fuq il-leġiżlazzjoni u jtejjeb il-bilanċ fit-tmexxija ta' kumitati u delegazzjonijiet.  Il-Bureau emfasizza l-importanza li l-Parlament jibqa' jkollu politika ta' tolleranza żero fuq il-fastidju. 

Il-pjan qed iħares ukoll lejn miżuri li jilħqu bilanċ aħjar bejn il-ħajja u x-xogħol kif ukoll taħriġ u attivitajiet ta' żvilupp.