Wirja storika tal-presepji Maltin fil-Parlament Ewropew
Din il-ġimgħa nfetħet l-akbar wirja ta’ presepji Maltin fil-qalba tal-Parlament Ewropew fi Brussell. Din l-inizjattiva ġiet organizzata u ospitata mill-MEP Malti Alex Agius Saliba, li ddeskriva l-wirja bħala 'ħolma li saret realtà'
minn Marianna Calleja
Din il-ġimgħa nfetħet l-akbar wirja ta’ presepji Maltin fil-qalba tal-Parlament Ewropew fi Brussell. Din l-inizjattiva ġiet organizzata u ospitata mill-MEP Malti Alex Agius Saliba, li ddeskriva l-wirja bħala “ħolma li saret realtà.”
Il-wirja, li tiffoka fuq il-wirt kulturali ta’ Malta fuq livell internazzjonali, tinkludi aktar minn 25 presepju maħdum b’dettalji straordinarji. Fosthom hemm żewġ xogħlijiet kbar li jirrappreżentaw lil Birgu u lil Marsa.
“Din mhix sempliċement wirja,” qal Agius Saliba, “imma ċelebrazzjoni tal-kultura tagħna u xhieda tat-talent straordinarju tal-artisti u l-ħaddiema Maltin.” Huwa żied jgħid li wara xhur ta’ preparazzjoni, huwa ta’ sodisfazzjon kbir li l-presepji Maltin qed jiġu apprezzati fil-qalba tal-Ewropa.
Il-proġett sar possibbli grazzi għall-kollaborazzjoni ta’ diversi entitajiet lokali, fosthom il-Ministeru għall-Kultura, il-Ministeru għal Għawdex, Għaqda Presepisti Għajnsielem, Natività Fil-Birgu, u Ħidma tal-Presepji.
Wieħed mill-aktar presepji li jispikka huwa dak f’għamla naturali li jirrappreżenta lil Birgu, li jiġbor fi ħdanu s-seħer storiku u l-legat artistiku ta’ Malta. Presepju ieħor prominenti huwa dak minn Marsa, interpretazzjoni moderna li turi l-innovazzjoni u l-viżjoni kreattiva tal-artisti Maltin.
Il-wirja rċeviet ukoll kliem ta’ tifħir minn MEP David Casa, li rrimarka, “Jien u Alex ma naqblux fuq ħafna affarijiet. Imma rrid nifraħlu tal-inizjattiva tiegħu biex tella’ wirja impressjonanti tan-Natività Fil-Birgu fil-Parlament Ewropew.”
Fuq il-paġna tiegħu fuq Facebook, Alex Agius Saliba kiteb: “Sodisfazzjon doppju bl-esebizzjoni tal-presepisti Maltin fil-Parlament Ewropew. Sodisfazzjon tara lil dawn id-dilettanti jesponu ħidmiethom u iktar minn hekk li tara prodott Malti jiġi apprezzat fuq livell Ewropew.”
Dan l-artiklu jifforma parti minn sensiela jisimha Ewropej. Din parti minn inizzjattiva ta' tlett organiżazzjonijiet tal-aħbarijiet, iffinanzjata mill-Parlament Ewropew biex iqarreb iċ-ċittadini Maltin max-xogħol tal-PE u jżommhom infurmati fuq is-suġġetti li jmissulhom il-ħajja ta' kuljum. Dan l-artiklu jirrefletti l-veduti tal-awtur. Il-Parlament Ewropew mhuwiex responsabbli għall-użu li jista' jsir mill-informazzjoni hawn provduta.
