Metsola tirringrazzja liż-żgħażagħ, u dawk li vvutaw għall-ewwel darba

Tindirizza lill-midja fis-Sala tal-Għadd tal-Voti ġewwa n-Naxxar, il-President tal-Parlament Ewropew Roberta Metsola rringrazzjat liż-żgħażagħ u dawk li vvuttaw għall-ewwel darba.

“Il-ħidma tibda’ minn għada,” hija qalet bi tbissima filwaqt li ferħet lill-kandidati l-oħra li kienu fit-tellieqa magħha.

“Din mhux elezzjoni faċli, speċjalment jekk tkun qed tikkontestaha għall-ewwel darba,” żiedet tgħid.

Metsola qalet li ġiet in-Naxxar sabiex tirringrazzja lill-ħaddiema, u voluntiera li taw sehem matul il-kampanja u wara.

Tindirizza d-distakk Metsola fakkret li l-għadd tal-voti għadu għaddej iżda ġaladarba d-distakk naqas, “il-poplu jrid bidla.”

“Dan huwa riżultat li fuqu nistgħu naħdmu,” Metsola temmet tgħid qabel ma rrispondiet numru ta’ mistoqsijiet oħra.

Metsola tieħu l-maġġoranza tal-voti

Minkejja li l-għadd tal-voti għadu ma laħaqx nofs ix-xogħol, l-indikazzjonijiet juru li Roberta Metsola ħadet il-maġġoranza tal-voti.

Bħalissa d-distakk bejn il-partiti jidher li hu qrib il-15,000 iżda sorsi viċin il-Partit Nazzjonalista qalu lill-ILLUM li d-distakk qed ikompli jinqos. Dan filwaqt li kkwotaw ċifri viċin it-13,000.

Filwaqt li jikkonferma d-distakk viċin il-15,000, il-Kap tal-Oppożizzjoni Bernard Grech qal il-Ħadd wara nofsinhar li dan huwa l-aqwa riżultat f’elezzjoni Ewropea, għall-Partit Nazzjonalista.

“Il-Partit Laburista jibqa’ fil-gvern it-Tnejn, imma dan hu messaġġ ċar għal min jaħseb li jista’ jkun arroganti,’ Grech qal bl-iktar vuċi kalma.