Roberta Metsola ġiet eletta mill-ġdid għat-tieni terminu bħala President tal-Parlament Ewropew, wara li għelbet lill-MEP Spanjola Irene Montero. Il-votazzjoni, li saret it-Tlieta, rat lil Metsola tikseb 562 vot minn 623 vot mitfugħin, filwaqt li Montero kisbet biss 61. Il-voti l-oħra kienu invalidi, u b'hekk din kienet l-iktar votazzjoni b'saħħitha li qatt ġiet reġistrata għal president tal-PE, skont l-osservaturi Ewropej.
Ir-rebħa ta' Metsola ġiet milqugħa b'applaws kbir fil-parlament.
Fil-kelmtejn tagħha, Metsola esprimiet il-gratitudni tagħha u wegħdet li taqdi b’umiltà, filwaqt li enfasizzat l-impenn tagħha li tissodisfa l-aspettattivi taċ-ċittadini Ewropej. Hija wegħdet li tagħmel l-Ewropa aktar aċċessibbli u post aħjar għal dawk kollha li jgħixu fiha.
Metsola tat ġieħ lil dawk li bnew l-Unjoni Ewropea, u enfasizzat il-kontribuzzjonijiet tagħhom fl-istabbiliment tal-prinċipji demokratiċi u standards, inkluż l-istat tad-dritt u l-ugwaljanza. Hija semmiet b'mod speċjali lill-eks Prim Ministru Eddie Fenech Adami għall-irwol tiegħu fil-formazzjoni tal-UE.
Hija saħqet ukoll fuq l-importanza tal-UE li tikseb indipendenza strateġika, stabilità, kompetittività globali, u s-sigurtà, u qalet li l-UE trid ukoll tipprovdi soluzzjonijiet reali għat-tibdil fil-klima.
Il-MPE Maltija kienet nominata mill-Partit Popolari Ewropew, l-akbar grupp fil-parlament, u jidher li kisbet l-appoġġ ta' diversi gruppi oħra.
Euronews faħħar lil Metsola qabel il-votazzjoni, u qal li l-MPE Maltija rnexxielha tiġbed kunsens minn diversi fratturi politiċi fil-parlament fi żmien meta l-firdit ideoloġiċi dehru aktar profondi minn qatt qabel fil-emiċiklu tal-parlament.
Metsola kienet l-iżgħar MPE li qatt mexxiet il-Parlament Ewropew meta ġiet eletta president għall-ewwel darba fl-2022 wara li kisbet 458 vot minn 690 fl-ewwel rawnd tal-votazzjoni.
Metsola ilha MPE mill-2013, wara li ġiet eletta mal-Partit Nazzjonalista. Qabel kienet taħdem fir-Rappreżentanza Permanenti ta’ Malta għall-Unjoni Ewropea u aktar tard bħala konsulent legali għar-Rappreżentant Għoli tal-Unjoni Ewropea għall-Affarijiet Barranin u l-Politika ta' Sigurtà.
F’Ġunju ġiet eletta mill-ġdid fil-parlament b’rekord Malti ta’ 87,473 vot ta’ l-ewwel preferenza. It-terminu ġdid tagħha se jkompli sas-sena 2027.
