L-iktar rebħa viċina minn fost kull referendum

Ir-referendum dwar jekk għandhiex tibqa' fis-seħħ id-deroga li tippermetti l-kaċċa fir-rebbiegħa intrebaħ bl-inqas maġġoranza rekordjata fl-istorja tar-referenda, hekk kif intrebaħ b’maġġoranza ta’ 2,220 vot, li f’termini ta’ persentaġġi, jirrappreżenta f’0.8% tal-voti.

Bis-saħħa ta’ dan, għada se jkun qed joħroġ il-permess legali li permezz tiegħu se jkun qed jinfetaħ l-istaġun tal-kaċċa fir-rebbiegħa. Dan jippermetti li l-kaċċaturi jikkaċċjaw għal 20 nofstanhar, bil-kundizzjoni li tinżamm il-kwota ta’ 11,000 gamiema u 5,500 summiena.

It-turnout f’din l-elezzjoni kien wieħed partikolarment tajjeb, speċjalment meta jiġu kkunsidrati lokalitajiet li ma kellhomx elezzjonijiet tal-kunsilli lokali x’jivvutaw fihom. Kien hemm ukoll oħrajn li għandhom konċentrazzjoni akbar ta’ kaċċaturi li fihom ġiet innutata turnout pjuttost kbira bħal fid-distretti numru 5, 6 u dak Għawdxi numru 13, li kellhom turnout ta’ 81%.

L-akbar ammont ta’ voti li kien hemm favur l-IVA dehru fid-distrett Għawdxi, b’14,179 li huma 62.1% tal-voti fid-distrett.

Min-naħa l-oħra, id-distrett li fihom deher l-akbar numru ta’ votanti li kienu kontra li titkompla din id-deroga, kien fl-10 distrett bi 12,224 vot, li huwa 70% tal-votanti f’dan id-distrett.

Bħala distribuzzjoni ta’ voti skont id-distretti, kienu 7 dawk li kellhom maġġoranza favur l-IVA waqt li 6 kellhom aktar voti favur il-LE. Kienet ċara li f’dawk id-distretti li partikolarment hemm konċentrazzjoni qawwija ta’ kaċċaturi, bħal fid-distretti 6 u 7, kien hemm vot ikbar favur it-tkomplija tad-deroga.

Bosta huma tal-idea li l-fatt li ż-żewġ kapijiet tal-partiti tkellmu dwar il-pożizzjoni tagħhom favur il-vot tal-IVA f’dan ir-referendum, kellu l-impatt tiegħu fuq il-votanti.

Interessanti l-ammont ta’ voti invalidi f’dan ir-referendum, meta tqis id-distakk bejn il-voti tal-IVA u tal-LE. F’kull distrett kien hemm iktar minn 100 vot invalidu, bil-medja tkun ta’ 183 vot u d-distrett li l-aktar kellu voti invalidi kien is-6 distrett b’268 vot.

Fil-konferenza stampa li ta l-Prim Ministru wara t-tħabbira tar-riżultat, qal li dan huwa mument li fih qed jingħata ċans ieħor lill-kaċċaturi li jsegwi l-liġi. Minbarra dan, Joseph Muscat afferma kif mhux se jittollera illegalitajiet u lest li jerġa’ jagħlaq l-istaġun tal-kaċċa bħalma kien għamel fl-istaġun tal-ħarifa.

Dan kien l-ewwel referendum tan-natura tiegħu minħabba li kien abrogattiv, hekk kif kien imsejjaħ mill-poplu wara ġbir ta’ firem li jammontaw għal 10% tal-popolazzjoni tal-votanti.