L-Ministri għall-Affarijiet Barranin qablu li tidħol fis-seħħ forza navali, bħala parti mill-ġlieda kontra t-traffikanti tal-immigranti li qed jaħdmu mil-Libja.
Id-dħul fis-seħħ mistenni jseħħ ix-xahar li ġej - fejn ħa tkun amministrata minn Ruma taħt it-tmexxija ta' Ammiral Taljan. Dan sostnietu l-Kap tal-Politika Barranija tal-UE Federica Mongherini.
Intant il-Gvern Libjan sejjaħ din l-operazzjoni bħala waħda "mhux umana", li probabilment mhux ħa tingħata l-permess biex topera fit-territorju Libjan. Hatem el-Ouraybi, kelliem għall-awtoritajiet f'Tobruk qal lil aġenzija tal-aħbarijiet AFP li kull azzjoni militari trid issir bil-kooperazzjoni tal-awtoritajiet Libjani.
L-operazzjoni militari bħala ġlieda kontra l-bastimenti li qed joperaw fl-ibħra Libjani, kif ukoll barra minn dawn l-ibħra "mhix ikkunsidrata bħala waħda umana."
Huwa żied jgħid li "l-gvern mhux ħa jaċċetta l-ebda vjolazzjoni tas-sovranità Libjana."
Dan kollu qiegħed isir hekk kif l-UE qed issibha bi tqila. aktar minn qatt qabel, biex tkampa bin-numru ta' immigranti li qed jaqsmu mill-Afrika u l-Lvant Nofsani lejn l-Ewropa, b'ħafna jitilfu ħajjithom fil-Mediterran.
L-operazzjoni navali tinqasam fi tliet fazijiet: Il-ġbir ta' informazzjoni fuq it-traffikanti tal-immigranti, li jintagħrfu dawk il-bastimenti li qed jintużaw mit-traffikanti, u finalment li wara li jiġu spezzjonati, jiġu mkissrin dawn l-istess bastimenti.
"Aktar milli t-tifrik tad-dgħajjes, iktar qed infittxu li nkissru l-mod ta' kif joperaw dawn ir-retikolati ta' traffikanti," temmet tgħid Mongherini, hekk kif bdiet tindirizza l-Ministri tal-Affarijiet Barranin Ewropej.
![[BIL-FILMAT] Il-Ministru tal-Ġustizzja jagħti ħjiel li ċ-ċittadini se jkollhom jitolbu investigazzjoni tal-pulizija qabel inkjesta maġisterjali](http://content.illum.com.mt/ui_frontend/thumbnail/684/0/whatsapp_image_2025-01-20_at_17.01.58.jpeg)
