Fid-dawl tal-attakki minn naħa ta’ Jiħadisti Musulmani, f’bosta bliet madwar l-Ewropa, il-Papa Fraġisku wissa li din hija prova li “Id-dinja tinsab fi gwerra.”
Minkejja dan, il-Papa ma naqasx jisħaq li l-gwerra mhix waħda reliġjuża, iżda waħda ta’ konflitt ta’ nteress u għall-kisba ta’ flus u risorsi.
Dan qalu lil grupp ta’ ġurnalisit qabel iż-żjara tiegħu fil-Polonja, wara li talbu l-opinjoni tiegħu dwar il-qtil tal-qassis kattoliku fi Franza nhar it-Tlieta li għadda, li ġie mwettaq minn żewġ ġuvintur li ħalfu l-alleanza tagħhom lill grupp terroristiku li jsejjaħ lilu nnifsu 'Stat Iżlamiku' (IS).
Il-qtil brutali tal-qassis fi Franza kien biss l-aktar wieħed riċenti minn sensiela ta’ attakki vjolenti fl-Ewropa, speċjalement fi Franza u l-Ġermanja.
Il-Papa qal kif qegħdin nisimgħu ħafna l-kelma “insikurezza”, mentri l-kelma li għandha tintuża hija “gwerra”.
“M’għandnix nibżgħu ngħidu l-verità, id-dinja qegħda fi gwerra għaliex tilfet il-paċi”, qal il-Papa Franġisku, filwaqt li żied jgħid li “meta nsemmi gwerra, nirreferi għal gwerra dwar flus u risorsi, u mhux waħda reliġjuża. Kull reliġjon trid il-paċi, huwa l-oħrajn li jridu l-gwerer.”
