Il-Ministru għas-Saħħa Chris Fearne llum ħabbar li ħarġet sejħa ta’ interess għall-proġett fiċ-ċimiterju tal-Addolorata li fost oħrajn se tinkludi l-estensjoni b’2,880 qabar f’dan iċ-ċimiterju kif ukoll ir-restawr estensiv tas-sit.
Is-sejħa ħarġet fil-forma ta’ pre-qualification questionnaire (PQQ) għall-bini tal-estensjoni tal-Addolorata, kif ukoll għar-restawr, maniġġjar tas-servizzi, kif ukoll manutenzjoni tal-istess sit.
“Il-proċess se jkun wieħed trasparenti, li anke ser ikun diskuss fil-Parlament, filwaqt li min japplika se jkun mitlub jonfoq mill-inqas €6 miljuni fir-restawr ta’ dan il-post, li għandu importanza arkitettonika,” qal il-Ministru Fearne.
Il-Ministru għas-Saħħa qal li bl-estensjoni tal-Addolorata se nkunu qegħdin nirrispondu għad-domanda li hawn għall-oqbra privati.
“Iċ-ċimiterju tal-Addolorata se jkun proġett ieħor fejn il-Gvern u l-Privat se jaħdmu id f’id biex joffru servizz aħjar f’post aktar dinjituż għall-għeżież tagħna,” qal il-Ministru Chris Fearne.
![[BIL-FILMAT] Il-Ministru tal-Ġustizzja jagħti ħjiel li ċ-ċittadini se jkollhom jitolbu investigazzjoni tal-pulizija qabel inkjesta maġisterjali](http://content.illum.com.mt/ui_frontend/thumbnail/684/0/whatsapp_image_2025-01-20_at_17.01.58.jpeg)
