Id-Deputat Prim Ministru Louis Grech qal li jemmen li l-masterplan propost għal Paceville għandu jerġa' jiġi rivedut u pjanat mill-ġdid.
Waqt li kien qed jieħu sehem fil-programm ta' diskussjoni Xtra fuq TVM ilbieraħ filgħaxija, il-Ministru Grech sostna li l-pjan "ġie kritikat kważi minn kulħadd, u jien nemmen li għandu jmur lura lejn id-drawing board u jkun pjanat mill-ġdid."
Għall-mistoqsija tal-preżentatur Saviour Balzan, dwar il-fatt li hemm skrutinju kbir fuq il-Gvern u allura kif seta' wieħed ma jarax li pjan bħal dan se jiġi 'żarmat', Grech sostna wkoll li għalkemm kien hemm din il-kritika, dan wera li kien hemm opportunità sabiex il-proġett isirlu skrutinju. "Meta l-Gvern ħareġ il-proġett għall-konsultazzjon, dan kien parti mill-proċess ta' trasparenza u kontabbiltà."
