Is-sistema tal-MATSEC għall-istudenti tas-sixth form se tinbidel minn waħda esklussivament akademika u bbażata biss fuq l-eżamijiet, bħala parti minn bidla fis-sistema edukattiva post sekondarja.
Waqt konferenza tal-aħbarijiet, il-Ministru għall-Edukazzjoni Evarist Bartolo qal li “bħalissa s-sistema tal-eżamijiet hija tellieqa biex jinkisbu ċ-ċertifikati, li mhux l-aħjar tip ta’ edukazzjoni. Huwa żied jgħid li “m’għandniex inħalltu ċ-ċertifikati mal-ħiliet, hekk kif ħafna studenti jinsew madwar 80% ta’ dak li jkunu studjaw sa sentejn wara l-eżamijiet.”
Il-Ministru qabbel dan mal-fast food li huwa qal li bħalma dan mhux tajjeb għas-saħħa, bl-istess mod l-eżamijiet mgħaġġlin huma ħżiena għall-edukazzjoni tat-tfal.
Waqt l-istess konferenza, il-Ministru għall-Edukazzjoni, Evarist Bartolo preżenta dokument ta’ 277 paġna li fih hemm numru ta’ proposti għall-konsulatazzjoni publika dwar titjib tas-sistema fis-sixth form. Il-proposti fid-dokument saru wara konsultazzjoni ma’ uffiċjali tas-sixth form, għalliema u studenti.
Uħud mill-proposti jinkludu l-bidla fil-ħinijiet għall-eżamijiet tal-MATSEC, żieda fin-numru ta’ sixth forms f’Malta u reviżjoni tas-sillabu tal-MATSEC li jirrifletti ħiliet aktar kontemporanji.
