Il-gvern ħabbar kif fuq is-sit fejn kien hemm l-ITS f'San Ġiljan, se jkun qed jinbena proġett b'investiment ta' €300 miljun. Il-proġett se jkun qed jinkludi lukanda ta' lussu tad-ditta 'Hard Rock Hotel' li se jkollha mat-315-il kamra, flimkien ma' 35 suite ta' 6 stilel. Minbarra dawn, se jkun hemm ukoll żewġ torrijiet li jinkludu mal-209 post residenzjali, 5 sulari ta' uffiċini flimkien ma' stabbiliment kummerċjali u ta' divertiment.
Dan il-proġett, se jkun l-ikbar wieħed li qatt sar f'pajjiżna minn investitur lokali, waqt li se jkunu qed jinħolqu mal-1,500 post tax-xogħol ġdid.
Il-grupp DB Hotels, li tiegħu Silvio Debono huwa chairman se jkun qed iħallas mas-€60 miljun għall-art, anke jekk il-Prim Ministru qal li din hi stmata li tiswa €56 miljun. Debono sostna li dan huwa l-ikbar ammont li qatt tħallas għall-art f'pajjiżna.
Tkellem ukoll il-Ministru Konrad Mizzi fejn minbarra li spjega iktar dwar x'se jkun jinkludi fih dan il-proġett, qal ukoll kif dan il-proġett se joħloq ħafna impjiegi u "jagħmel ħafna ġid lill-pajjiż."
Fil-kummenti tiegħu, il-Prim Ministru Joseph Muscat qal kif il-valutazzjoni tal-art saret b'metodu li ma kienx jintuża qabel. "Għandna metodoloġija xjentifika u internazzjonali hekk kif in-naħa tal-Lands u tal-kumpanija Deloitte ħadmu sabiex ikun hemm ftehim fuq il-valutazzjoni." Muscat kompla jgħid li l-kuntratt huwa wieħed pubbliku u qiegħed għall-iskrutinju tal-pubbliku. Il-Prim Ministru spjega wkoll kif il-pajjiż se jkun qed idaħħal mas-€60 miljun f'taxxi u VAT. Muscat kompla jgħid li jekk l-investitur jiżviluppa iktar mill-proġett propost, se jkollu iħallas aktar.
Il-Prim Ministru kompla jgħid li Malta m'għadhiex destinazzjoni tax-xemx u l-baħar biss, u għaldaqstant jeħtieġ li jitjieb il-livell tal-prodott lokali, mhux biss dak turistiku, imma anke dak tal-infrastruttura. Żied jgħid li t-turiżmu ta' kwalità joħloq effett ekonomiku enormi u faċilitajiet ta' kwalità ogħla jattiraw turisti li jħallsu aktar, u b'hekk, il-ħaddiema jkollhom pagi aħjar.
Min-naħa l-oħra is-sit tal-ITS il-ġdid fi Smart City se jkun atrezzat bl-aqwa faċilitajiet, flimkien ma' lukanda.
Kienet il-gazzetta ILLUM li iktar minn sena ilu, fil-ħarġa tal-25 ta' Ottubra tal-2015, żvelat, kif l-iżvilupp l-aktar preferut mill-Gvern ċentrali, kien se jsir minn lukandier ewlieni Malti li diġà għandu investiment ta’ akkomodazzjoni turistika madwar il-pajjiż.
