'Emmnu fija ħa nemmen fikom ħa mmexxu lil pajjiżna ‘il quddiem' - Robert Abela
Eluf ta' nies jinġabru għal tmiem pjuttost kbir għal kampanja ta' Robert Abela
minn Albert Gauci Cunningham
Quddiem folla kbira ta’ nies li probabilment kienet tlaħħaq l-eluf u entużjażmu qawwi tal-partitarji fil-pjazza ta’ Raħal Ġdid, Robert Abela sejjaħ dak ta’ bħalissa bħala l-mument tal-għaqda; għaqda fil-partit u għaqda fil-pajjiż.
F’diskors qawwi, probabilment l-aktar qawwi tal-kampanja, Abela appella; “Nitlobkom il-lealtà u l-kuraġġ tagħkom, emmnu fija ħa nemmen fikom ħa mmexxu lil pajjiżna ‘il quddiem.”
“Taqtgħux qalbkom. Jiena ngħidilkom se mmorru għal żmien aqwa milli konna,” saħaq Abela.
“L-ewwel deċiżjoni tiegħi se tkun li ngħannaq u nieħu b’id dawk kollha li ma qablux miegħi matul din il-kampanja. Ngħannaq lil Chris,” qal Abela għall-għajjat ta’ approvazzjoni u ċapċip mill-eluf preżenti.
Reġa sostna li hu baqa’ leali lejn Joseph Muscat sal-aħħar u li qatt ma pparteċipa f’manuvri minn taħt biex Muscat jitlaq.
“L-għażla hija bejn il-kontinwità u allura r-riċetta li tatna tant suċċess jew riċetta ġdida, li jista’ jkun ittina riżultati aħjar kif ukoll agħar. Dan mhux iż-żmien ta’ esperimenti,” sostna Abela. Kompla jsostni li l-ġudizzju tal-membri li se jivvutaw għandu jkun dwar min hu kapaċi jwassal l-messaġġ l-aħjar u min kapaċi jrebbaħ lill-Partit Laburista.
'M'aħniex il-partit tal-għira'
“Irridu nżommu r-riċetta ta’ partit li huwa miftuħ għal kulħadd, li żgur li mhux se jingħalaq f’fortizza, partit li jrid ikompli jinfetaħ għal min hu ġenwin. Fil-mument li nibdew bil-messaġġi diviżivi nkunu qed nagħmlu żball. Dan hu l-mument tal-għaqda fil-partit, li se twassalna għall-għaqda nazzjonali. Aħna rridu nitkellmu dwar politika li ma tagħrafx uċuħ, ta’ Malta waħda u Għawdex wieħed, aħna m’aħniex il-partit tal-għira imma l-partit li jieħu pjaċir bis-suċċess tan-nies,” qal Abela, f’dak li wieħed jista jqis bħala spjegazzjoni tal-viżjoni tiegħu għall-futur.
Dwar l-elezzjoni tas-Sibt sostna illi kif kien hemm “biex kull membru jkollu d-dritt tal-vot. Issa se nerġa nkun hemm biex inkun ċert li kulħadd jagħżel b’mod liberu,” qal Abela li fakkar li l-partit dejjem ipprattika l-libertà ta’ ħsieb u opinjoni.
Hu jirrakkonta kif iltaqa’ ma’ nies li għadhom jiffaċċjaw spejjeż kbar u livell ta’ għixien mhedded.
“Jiena rrid li kulħadd ikollu livell ta’ għixien diċenti,” qal Abela li fakkar li huwa qed iwiegħed li l-anzjani għandu jkollhom il-mediċini kollha b’xejn. “Iva se tiswina ħafna, €40 miljun fis-sena. Imma issa nistgħu nagħmluha. Ħalli l-ġid jkompli jinxtered.”
'Malli għidt li se nagħmel riforma fil-PBS bdew l-attakki'
U ma setax jonqos li jsemmi l-PBS. ‘Irridu, iva, xandir nazzjonali iktar b’saħħtu. Xandir indipendenti, imparzjali u effettiv,” sostna Abela li reġa wiegħed riforma fix-xandir nazzjonali. “Kommess li nagħmel bidliet, bidliet kuraġġużi li kulħadd qagħad lura milli jagħmilhom. Ħadd mhu komdu biha riforma fil-PBS għax malli għidt li se nagħmilha bdew ġejjin l-attakki minn kullimkien,” qal il-kandidat għat-tmexxija tal-PL u tal-pajjiż.
.‘Irridu mexxej li m’għandux idejh marbutin u li taf li qed titkellem miegħu mhux ma’ xi ħadd moħbi’
Id-Deputat Laburista Clayton Bartolo qal li kienet deċiżjoni tiegħu li jkun Raħal Ġdid u mhux post ieħor illejla. Għadda messaġġ ta’ kuraġġ lil dawk li ma ddeċidewx kif se jivvutaw nhar is-Sibt, jew dawk li ma jistgħux jgħidu lil min se jivvutaw għax skontu qed jibżgħu jew saħansitra dawk li qed jibżgħu għal xogħolhom. “U minn qed itina dan il-kuraġġ? Robert Abela,” saħaq Bartolo.
Huwa qal li ż-żewġ kandidati huma tajbin għalkemm sostna li Abela jispira aktar l-għaqda, “persuna li ma jippruvax jisparixxi lil Joseph Muscat, imma mbagħad jinduna li intom tħobbuh. Persuna li f’kull dibattitu politiku joħroġ rebbieħ,” qal id-Deputat.
“Għad baqa’ ħafna xogħol xi jsir. Ejja nibqgħu naħdmu sal-aħħar minuta għax aħna rridu mexxej li ma jkollux idejh marbutin b’ħafna kompromessi, mexxej li taf li qed titkellem miegħu mhux ma’ persuni li joqgħodu jilagħbu noli, filli tarahom u filli le,” sostna Bartolo f’riferenza kważi ovvja għal Lou Bondi.
Mal-ILLUM Lou Bondi ċaħad akkużi u diċeriji li issa ilhom iduru fil-partit u li jgħidu illi hu parti mit-tim tal-kampanja ta’ Chris Fearne.
Bartolo qal li Robert sal-aħħar sekonda baqa’ leali u sostna li hekk hemm bżonn isir minn nhar il-Ħadd ukoll, li kulħadd jimxi wara l-Mexxej ġdid b’lealtà.
‘Ma kienx hemm darba li ma semmejtx lil Joseph Muscat’
Il-preżentatur Manuel Cuschieri ddeskriva lil Robert Abela bħala bniedem li japprezza u mhux ingrat. “Inti persuna li tapprezza u m’intix ingrat. Xi kultant f’dan iż-żmien ninsew lil min għamel tant ġid. Ma kienx hemm darba f’din il-kampanja li ma semmejtx lil dak li għamlilna tant ġid u li se jibqa’ f’qalbna, Joseph Muscat,” qal Cuschieri għall-approvazzjoni ta’ dawk preżenti.
Cuschieri sostna illi ħadd m’għandu jfixkel l-għaqda wara li jkun elett Mexxej Laburista ġdid.
Intant id-Deputat Silvio Parnis sostna li "l-partit tagħna li tant għamel bidliet u ġab ġid, kontinwità għandu bżonn. “Ejjew ħa nkomplu t-triq tal-onestà,” appella Parnis.
Intant Darren Lynch, Viċi Sindku ta’ Raħal Ġdid sostna: “Jiena se nagħżel l-onestà, l-integrità u l-imħabba biex Malta tkun aħjar milli hi,” saħaq .
