L-Ewroparlamentari Nazzjonalista Roberta Metsola ġiet innominata bħala l-Ewroparlamentari tas-Sena u dan għall-ħidma tagħha fuq il-ġustizzja.
Din kienet it-tielet darba li Metsola ġiet innominata għal dan il-ġieħ.
L-organizzaturi faħħru l-ħidma tagħha dwar il-ħarsien tal-istat tad-dritt u l-ġlieda kontra l-korruzzjoni fl-Ewropa kollha u r-rwol tagħha fil-ħarsien tal-ġustizzja, il-verità u r-responsabbiltà wara l-qtil tal-ġurnalista Daphne Caruana Galiza.
"Huwa unur li wieħed ikun nominat għal dan il-premju prestiġjuż għat-tielet darba. Meta ġejt eletta għall-ewwel darba fil-Parlament Ewropew, ġejt determinata li nuri li r-realtajiet ġeografiċi ta' Malta mhumiex ta' xkiel għad-determinazzjoni tagħna bħala pajjiż jew bħala poplu. Nispera li din in-nomina turina - partikolarment lin-nisa żgħażagħ - li hija s-saħħa tal-argumenti li hu l-iktar importanti u mhux il-volum tal-vuċi,” saħqet Metsola fl-ewwel kummenti tagħha.
Is-sena li għaddiet, Metsola kienet ir-rapporteur li kitbet u nnegozjat il-liġi l-ġdida tal-UE dwar il-Gwardja tal-Fruntiera u tal-Kosta Ewropea, li ppermettiet 10,000 gwardja ġdida fil-fruntieri tal-Ewropa.
Il-MPE Metsola ġiet eletta wkoll bħala l-ko-president tal-korp il-ġdid Kontra l-Korruzzjoni tal-Parlament Ewropew.
L-MEP Metsola ngħatat il-premju tal-Ewroparlamentari tas-Sena darbtejn.
Ir-rebbieħa f'kull kategorija jitħabbru waqt ċerimonja fi Brussell fil-25 ta 'Marzu 2020.
