Il-Qorti ħellset lill-eks uffiċjal ta’ Kastilja, Neville Gafa mill-akkużi li hedded lill-ġurnalist Taljan Nello Scavo waqt argument fuq Twitter matul is-sajf li għadda.
Il-Maġistrat Charmaine Galea saħqet li ma kinitx konvinta b’dak li qal Scavo, jiġifieri li ħassu mhedded bit-tweet ta’ Gafa li kienet tgħid: “Waqqaf in-negozju maħmuġ tiegħek. Jekk le se nwaqqfuk aħna.”
Gafa kien qed iwieġeb tweet oħra ta’ Scavo wara li l-NGO Alarm Phone kienet ikkritikat u akkużat lill-pajjiżi Ewropej li qed jappoġġjaw lill-gwardji tal-kosta Libjani biex immigranti jintbagħtu lura l-Libja.
Il-ġurnlist jaħdem mal-gazzetta Avvenire u ilu minn Ottubru taħt il-protezzjoni tal-Pulizija.
Madanakollu, il-Qorti nnutat li dakinhar tat-tweet, f’Ġunju, Scavo ma kienx irreaġixxa b’mod li ssuġġerixxa li kien qed iħossu mhedded.
Il-Qorti nnutat ukoll li l-istess Scavo ma rrapportax lill-Pulizija Taljana u anke insistiet li falla milli jispjega kif ħassu mhedded.
Fid-deċiżjoni tagħha, il-Maġistrat spjegat kif il-proċeduri f’Malta bdew biss wara li l-Pulizija Maltija għamlu kuntatt ma’ Scavo kważi xahar wara, hekk kif kienu rċevew ilment minn xi ħadd f’Malta.
Meta xehed fil-każ, Gafa kien ċaħad li l-intenzjoni tiegħu kienet li jhedded lill-ġurnalist u saħaq li l-kummenti tiegħu kienu indirizzati lill-NGO.
Qal li l-kumment tiegħu kien wieħed politiku dwar l-immigrazzjoni illegali u x-xogħol tal-NGOs.
L-ebda rappreżentant minn Alarm Phone ma ntalab jixhed.
Ta’ min ifakkar li Gafa kien saħaq li kien imqabbad mill-Gvern immexxi minn Joseph Muscat biex ikun punt ta’ referenza, anke jekk mhux uffiċjali, mal-awtoritajiet Libjani biex tkun ikkontrollata s-sitwazzjoni tal-immigrazzjoni.
L-irwol tiegħu ġie tterminat f’Jannar li għadda meta Robert Abela sar Prim Ministru.
