Il-Kummissjoni Ewropea tapprova ftehim għal 200 miljun doża tal-vaċċin Novavax

Illum, il-Kummissjoni Ewropea approvat is-seba' Ftehim ta' Xiri bil-Quddiem ma' kumpanija tal-farmaċewtika biex tiżgura l-aċċess għal vaċċin potenzjali kontra l-COVID-19 fl-aħħar tliet xhur tal-2021 u fl-2022.

B'dan il-kuntratt, l-Istati Membri se jkunu jistgħu jixtru sa 100 miljun doża tal-vaċċin Novavax, bl-għażla għal 100 miljun doża oħra tul l-2021, l-2022 u l-2023, ladarba jiġi rieżaminat u approvat mill-EMA bħala sikur u effettiv. L-Istati Membri se jkunu jistgħu wkoll jagħmlu donazzjoni ta' vaċċini lil pajjiżi b'introjtu baxx u medju jew jiddiriġuhom lil pajjiżi Ewropej oħra.

Il-kuntratt tal-lum jikkumplementa portafoll diġà wiesa' ta' vaċċini li se jiġu prodotti fl-Ewropa, inklużi l-kuntratti ma' AstraZeneca, Sanofi-GSK, Janssen Pharmaceutica NV, BioNtech-Pfizer, CureVac, Moderna u d-diskussjonijiet esploratorji konklużi ma' Valneva. 

Il-President tal-Kummissjoni Ewropea, Ursula von der Leyen, stqarret li issa li l-varjanti ġodda tal-coronavirus qed jinfirxu fl-Ewropa u madwar id-dinja u allura "dan il-kuntratt il-ġdid ma' kumpanija li diġà qed tittestja l-vaċċin tagħha b'suċċess kontra dawn il-varjanti huwa miżura ta' salvagwardja oħra għall-protezzjoni tal-popolazzjoni tagħna."