L-aġġornament tas-saħħa jbiddel l-enfasi minn fuq il-każi l-ġodda għall-pazjenti fl-isptar

Id-Deputat Prim Ministru u Ministru għas-Saħħa Chris Fearne ħabbar li mil-lum, l-infographic li tkun ippubblikata kuljum dwar is-sitwazzjoni tal-pandemija f'Malta, se tbiddel l-enfasi minn fuq il-każi l-ġodda għal fuq l-għadd ta' pazjenti fl-isptar u fl-ITU.

Fearne qal dan fuq Twitter hekk kif ħabbar ukoll li bħalissa f'Mater Dei hemm 29 pazjent u tnejn minnhom jinsabu fit-Taqsima tal-Kura Intensiva.

L-għadd ta' pazjenti fl-isptar jibqa' wieħed baxx minkejja li Malta għandha aktar minn 700 każ attiv ta' Covid-19.

The daily #saħħa Covid-19 #infographic will start placing main emphasis on covid hospitalizations and ITU admissions. Today there are 29 Covid positive patients at Mater Dei, 2 of whom are in ITU

— Chris Fearne (@chrisfearne) September 7, 2021

Intant tħabbar ukoll li minn meta waslet l-ewwel konsenja tal-vaċċin, Malta amministrat aktar minn 800,000 tilqima. 

Mil-bieraħ ukoll Malta bdiet tamministra l-booster tal-vaċċin lill-anzjani residenti fi djar ta' kura u fil-ġranet li ġejjin se jirċievu t-tilqima anke dawk il-persuni li minħabba kundizzjonijiet mediċi, ma bnewx biżżejjed immunità biż-żewġ dożi.

Minn Ottubru, il-booster se jingħata wkoll lil dawk l-anzjani li għandhom 'il fuq minn 70 sena.