L-akbar tħassib tan-negozji żgħar għal din is-sena huma l-ispejjeż li qed jiżdiedu u anke l-irkupru mill-effetti tal-pandemija tal-Covid-19.
Dan irriżulta minn stħarriġ li sar mill-Kamra għan-Negozji Żgħar li għalhekk qed tagħmel għadd ta' proposti, fosthom tnaqqis ġenerali tal-VAT minn 18% għal 15.5% u anke t-tneħħija tat-taxxa tas-sisa fuq prodotti essenzjali, bħall-ilma, xorb mhux alkoħoliku u prodotti sanitarji.
Is-sondaġġ sar fost 250 negozju.
16% tas-sidien ta’ dawn in-negozji qalu li l-ispejjeż li dejjem qed jiżdiedu mistennija joffrulhom l-akbar sfida għal din is-sena, filwaqt li 14% qalu li l-pandemija u l-irkupru warajha jibqgħu l-akbar sfidi għalihom anke tul l-2022.
10% tal-istess negozji qalu li l-akbar sfida għalihom hija l-inċertezza li ġġib magħha l-elezzjoni ġenerali u 10% għażlu n-nuqqas ta’ ħaddiema bħala l-akbar sfida li qegħdin u mistennija jiffaċċjaw tul din is-sena.
44% jemmnu li din is-sena se tkun aħjar...
44% tan-negozji qalu li qed jistennew sena aħjar mis-sena li għaddiet, filwaqt li 39% qed jaħsbu li x-xogħol se jkun simili għal dak tas-sena li għaddiet.
21% biss qalu li qed jistennew li x-xogħol ikun agħar minn dak fl-2021.
Mistoqsija dwar ix-xogħol li kellhom is-sena li għaddiet, 23% qalu li daħlu, bejn wieħed u ieħor, l-istess ammont, filwaqt li 33% qalu li rreġistraw inqas dħul mis-sena 2020.
39% qalu li marru aħjar mill-2020.
Dawk li wieġbu li daħlu inqas, qalu li r-raġuni ewlenija kienet il-pandemija, filwaqt li oħrajn semmew li kien hawn inqas flus fl-idejn u anke aktar spejjeż.
Iridu li jonqos il-perjodu tal-kwarantina...
Dwar il-pandemija, 71% tas-sidien jemmnu li l-perjodu tal-kwarantina għandu jonqos filwaqt li 58% jemmnu li għandhom jinbidlu wkoll ir-regoli marbuta mal-ivjaġġar.
56% jemmnu wkoll li għandhom ikomplu jonqsu r-restrizzjonijiet u 71% insistew li f’dan l-istadju għandna nitgħallmu ngħixu mal-Covid-19.
Milied: 34% kienu sodisfatti bix-xogħol
Mistoqsija dwar il-Milied, 29% qalu li kienu sodisfatti, 5% wieġbu li kienu sodisfatti ħafna. 24% ma tant kienu kuntenti xejn filwaqt li 32% qalu li x-xogħol kien simili għal dak tas-soltu.
Fil-fatt, 40% qalu li x-xogħol baqa’ l-istess u 1% biss wieġbu li x-xogħol kien aħjar mis-snin l-imgħoddija.
X’qed tipproponi l-Kamra?
Ibbażati fuq dan is-sondaġġ, il-Kamra għan-Negozji Żgħar u Medji ħarġet b’dawn il-proposti:
- Tneħħija tat-taxxa tas-sisa fuq prodotti essenzjali, bħall-ilma, xorb mhux alkoħoliku u prodotti sanitarji
- Tnaqqis ġenerali tal-VAT minn 18% għal 15.5%
- Tnaqqis tal-perjodu tal-kwarantina għal ħamest ijiem
- Sistema aktar organizzata biex jiġu attirati ħaddiema minn pajjiżi terzi
- Tnaqqis fir-restrizzjonijiet marbuta mal-ivjaġġar
