'Gvern Nazzjonalista ma jneħħix il-liġi tal-kannabis imma jtejjibha' - Grech

Il-Kap tal-Oppożizzjoni u tal-Partit Nazzjonalista, Bernard Grech saħaq li Gvern Nazzjonalista mhux se jneħħi l-liġi dwar il-kannabis rikreattiva imma se jkun qiegħed jtejjibha.

Bernard Grech qal dan waqt li kien qed jiġi intervistat mill-ġurnalist Luigi Sapiano waqt attività taħt it-tinda f’Birkirkara.

Mistoqsi dwar il-pożizzjoni li ħa tal-Partit Nazzjonalista fuq il-liġi tal-kannabis u jekk jaħsibx li tilef voti meta fil-Parlament ivvota kontra, Grech saħaq li l-PN qatt ma jiddeċiedi fuq il-voti.

Insista li wara li tkellem mal-esperti, il-Partit Nazzjonalista ħa l-pożizzjoni kontra n-normalizzazzjoni tal-kannabis. 

Madanakollu saħaq li jekk ikun elett fil-Gvern mhux se jneħħi din il-liġi imma se jaħdem biex itejjibha. Fost oħrajn qal li sal-lum, dawk li jikkonsmaw il-kannabis, għad ma għandhomx aċċess biex jixtruha b'mod sigur.

Dwar il-kritika li l-PN huwa konservattiv u kontra kwistjonijiet bħall-abort jew il-kannabis, Grech insista li l-PN kien ukoll favur is-sħubija fl-Unjoni Ewropea, it-tkabbir tal-ekonomija, il-ħolqien ta' setturi ekonomiċi ġodda, favur l-ambjent u ħafna aktar.

'Abela ma għandux ideat ... għalhekk marbut mal-bejgħ tal-passaporti'

Bernard Grech qal ukoll li l-Prim Ministru Robert Abela ma għandux ideat ta’ kif se joħloq il-ġid fil-pajjiż u huwa għalhekk li “jibqa’ marbut mal-bejgħ taċ-ċittadinanza.”

Mistoqsi għaliex ma jridx ineħħi l-iskema tal-bejgħ taċ-ċittadinanza, il-Kap Nazzjonalista insista li għall-kuntrarju ta’ Gvern Laburista, Gvern immexxi minnu mhux se jkun qed jiddependi biss minn din l-iskema jew inkella mid-dejn pubbliku biex joħloq il-ġid.

“Jien liberu u ma għandi l-ebda ftehim ma’ kriminali,” insista Grech waqt li saħaq li Gvern Nazzjonalista joħloq il-ġid bil-ħolqien ta’ setturi ekonomiċi ġodda.

Insista li jekk il-Partit Nazzjonalista jkun elett fil-Gvern, jassigura li ħadd ma jixtri ċ-ċittadinanza għal skopijiet personali imma jixtriha biss għax ikun kburi bil-pajjiż.

“Tixtriha jekk int trid u tkun kburi b’pajjiżi. Tixriha jekk tkun lest tikxef ismek u tassoċja ruħek ma’ pajjiżi. Jekk ma tridx, mela jien ma għandhiex bżonn flusek,” insista Grech.

Tenna li Gvern Nazzjonalista jassigura li min jixtri ċ-ċittadinanza ikollu rabta diretta ma’ Malta.

'Din l-elezzjoni mhux dwari jew il-PN...'

Grech kien mistoqsi wkoll dwar is-sondaġġi li għal ġimgħa oħra qed ibassru rebħa kbira għall-Partit Laburista.

Nawgura li Konrad Mizzi verament isib il-paċi u s-serħan. Ifisser li lanqas kellu paċi u lanqas serħan minkejja l-miljuni li għaddew minn taħt idejh

Insista li hu jkejjel is-suċċess mhux fuq il-voti imma fuq dak li se jħalli warajh, waqt li saħaq li f’sena u ħames xhur il-PN mexa ‘l quddiem u qiegħed f’sitwazzjoni ħafna aħjar.

“Din l-elezzjoni mhux dwari jew il-Partit Nazzjonalista imma dwar il-viżjoni li l-poplu jrid għal dan il-pajjiż,” kompla Grech waqt li tenna dak li issa ilu jgħid tul kampanja sħiħa, jiġifieri li l-PN ippubblika l-programm elettorali tiegħu u l-Partit Laburista “qed jikkuppjah.”

'Nawgura li Konrad verament isib il-paċi u s-serħan'

Grech kien mistoqsi wkoll dwar Konrad Mizzi u l-istqarrijiet li għamel fl-aħħar jiem.

“Nawgura li Konrad Mizzi verament isib il-paċi u s-serħan. Ifisser li lanqas kellu paċi u lanqas serħan minkejja l-miljuni li għaddew minn taħt idejh,” insista Bernard Grech.

Mistoqsi jekk ikeċċix il-Kummissarju, jekk hu jkun Prim Ministru u jibqa’ ma jkunx hemm każ kontra Mizzi, il-Kap tal-Oppożizzjoni insista li hu ma jindaħalx lill-awtoritajiet.

“Taħti l-awtoritajiet ikunu awtonomi u liberi li jieħdu azzjoni,” insista.

Madanakollu saħaq li fuq sempliċiment drone li marret fuq daru, il-Pulizija għadha qed tinvestiga u dan meta, fi kliemu, hemm “konferma li mhuwiex tal-Awtorità tal-Ippjanar.”

Joseph Muscat u l-ispag

Tkellem ukoll dwar il-Prim Minsitru Robert Abela u għal darba, tnejn, qal li dan ma jiddeċidix u jiddeċiedi biss wara li “jiġbdulu l-ispag.”

Mistoqsi min qed jiġbed dawn l-ispag, Grech qal li din tista’ tkun l-Unjoni Ewropea li ġġiegħlu jiddeċiedi kif ġara fil-każ tal-bejgħ taċ-ċittadinanza jew “Joseph Muscat li meta ma qabilx miegħu qabiżlu għan-nofs.”