Grupp ta' residenti Beltin ma jidhirx li se jċedu malajr għall-Avviż Legali li estenda l-mużika fil-Belt Valletta sas-siegħa ta’ filgħodu tant li bħalissa qed jieħdu pariri legali bil-għan li jieħdu l-każ tagħhom quddiem il-Qorti.
Kelliem għall-Valletta Residents Revival, grupp fuq Facebook li jiġbor fih xejn inqas minn 600 resident mill-Belt Valletta, qal mal-gazzetta ILLUM li ġew avviċinati minn avukat li lest jgħin lir-residenti Beltin jkomplu jiġġieldu din il-ġlieda.
Fil-fatt, bħalissa għaddejin id-diskussjonijiet bil-għan li jistabbilixxu liema tkun l-aħjar triq legali li jaqbdu. Dwar dan saru diversi laqgħat.
It-tir huwa li fil-ġimgħat li ġejjin, jieħdu l-kwistjoni tagħhom quddiem il-Qorti, ġaladarba l-Gvern ma jidhirx li se jiċċaqlaq minkejja l-oppożizzjoni b’saħħitha li kien hemm kontra dan l-Avviż Legali, inkluż mill-Assoċjazzjoni li tirrappreżenta lill-lukandiera u lis-sidien tar-ristoranti.
“Żgur li mhux se norqdu fuq din il-kwistjoni. Qed niddiskutu u fi żmien opportun se nieħdu l-passi kollha neċessarji,” insista kelliem għall-grupp ta’ residenti Beltin.
L-Avviż Legali ddaħħal ħabta u sabta mingħajr konsultazzjoni ta’ xejn ix-xahar li għadda u qajjem rabja kbira fost għadd ta’ residenti Beltin. Bil-liġi l-ġdida, l-istabbilimenti fil-Belt Valletta jistgħu jibqgħu bil-mużika fuq barra wara l-11pm iżda “f’livell moderat.”
Madanakollu, ir-residenti qed jisħqu li l-Avviż Legali huwa vag għax minkejja li jgħid “livell moderat” jibqa’ ma jispjegax eżatt dan xi jfisser u għalhekk huwa l-istabbiliment li jiddeċiedi għalih innifsu kemm għandha tkun għolja jew baxxa l-mużika wara l-11pm.
F’kummenti ma’ din il-gazzetta, is-Sindku Belti Alfred Zammit, li lanqas ma kien ikkonsultat dwar dan l-Avviż Legali, kien qal li dan ifisser li wara l-11pm trid tieqaf il-mużika live u l-istabbilimenti jħallu biss ‘backround music’ li tinstema’ minn dawk li jkunu fuq l-imwejjed.
Madanakollu, jekk wieħed jara l-filmati li r-residenti bagħtu lil din il-gazzetta u anke dawk li ġew ippubblikati fuq gruppi fuq Facebook, il-verità hija xorta oħra. Il-mużika qed tibqa’ għolja anke wara l-11pm u kien hemm stabbilimenti li baqgħu għaddejin anke bil-mużika live, daqq, kant u żfin.
‘L-Avviż Legali jgħodd għall-kunċerti u tiġijiet ukoll?’
Propju għalhekk li r-residenti mhux se jċedu, għax fi kliem il-kelliem tal-Valletta Residents Revival hemm stabbilimenti li mis-seba qed jieħdu l-id.
“Ara l-filmati tan-nies u tinduna kemm hemm abbużi. L-esaġerazzjoni dejjem ħażina,” insista.
Tenna li l-Avviż Legali jħalli lok għal interpretazzjoni wiesgħa. Saħaq li lanqas ma jgħid jekk hux qed jirreferi biss għall-istabbilimenti bħar-ristoranti u l-bars jew inkella għal kwalunkwe attività li ssir il-Belt Valletta.
Semma attivitajiet li jsiru fuq il-bejt tal-Sala tal-Mediterran għall-Konferenzi, li jiġi fl-istess livell mal-gallariji ta’ residenti li jgħixu fil-viċin u anke attivitajiet oħra bħal kunċerti u tiġijiet f’diversi bnadi tal-Belt.
“L-Avviż Legali jgħodd għal dawn ukoll? Anke dawn jistgħu jibqgħu għaddejin bil-mużika sas-siegħa ta’ filgħodu?”, kompla jisħaq l-istess Kelliem. “Qed insiru dejjem aktar storbjużi fl-attivitajiet li nagħmlu.”
Insista li ma hemm l-ebda konsiderazzjoni għall-interessi u l-bżonnijiet tar-residenti fl-affarijiet u l-attivitajiet li jiġu organizzati fil-Belt Valletta.
“Anke l-Jazz Festival. Vera li mhux mal-lejl, imma l-provi tas-sound hemm bżonn tagħmilhom fis-sagħtejn ta’ waranofsinhar meta jkollok anzjani jidħlu jistrieħu?” kompla jisħaq.
Laqgħa dalwaqt mas-sidien tal-Boutique Hotels
Kien hawn li saħaq li bħalissa għaddejjin diskussjonijiet bejn il-Valletta Residents Revival u anke diversi stakeholders kollha bil-għan li dwar din il-kwistjoni jagħqdu l-forzi u jaħdmu flimkien.
“Kuntrarjament għal dak li għamel il-Gvern, aħna qed inpoġġu madwar mejda u niddiskutu,” insista.
Fil-fatt, fost oħrajn, fil-jiem li ġejjin se tkun qed issir laqgħa formali wkoll mas-sidien tal-Boutique Hotels li ħafna minnhom ma huma kuntenti xejn b’dan l-Avviż Legali.
X’ġara fl-aħħar ġimgħat?
Wara li ħareġ l-Avviż Legali, ir-residenti Beltin ipprotestaw bi kbir u saħansitra ħeġġew lill-Kunsill Lokali biex jieħu pożizzjoni.
Is-Sindku Alfred Zammit kien qal mal-gazzetta ILLUM li se jkun qed jitlob lill-Gvern biex jiċċara l-Avviż Legali u biex il-mużika tas-siegħa titħalla biss bejn il-Ġimgħa u l-Ħadd. Madanakollu, dwar dan il-Kunsill Lokali ma għamel xejn.
Minflok kienet saret laqgħa tal-Kunsill, li għaliha attendew għadd ta’ residenti. Din il-laqgħa spiċċat b’ħafna għajjat u tisbit fuq il-mejda u anke ġlied bejn is-Sindku u l-Viċi Sindku u l-Kunsill Lokali baqa’ ma ħa l-ebda pożizzjoni dwar dan, minkejja l-insistenza mill-kunsilliera tal-Partit Nazzjonalista biex il-Kunsill Lokali jitlob li dan ikun irrevokat.
Il-gazzetta ILLUM, kienet talbet kemm lid-Deputati Laburisti tal-Ewwel Distrett u anke lill-kunsilliera Laburisti tal-Belt biex jagħtuha l-pożizzjoni tagħhom. Ħadd minnhom ma wieġeb.
Għad-Deputati, kien wieġeb il-Partit Laburista jgħid li l-Avviż Legali joħloq bilanċ.
Kien għalhekk li l-ILLUM marret direttament Kastilja tistaqsi wkoll lill-Prim Ministru Robert Abela jekk il-Gvern setax jikkonsulta aktar biex jinħoloq bilanċ aħjar. Madanakollu, il-Prim Ministru wieġeb biss li l-Avviż Legali diġà ħoloq il-bilanċ meta jgħid li wara l-11pm għandu jkun hemm “mużika moderata.”
Eventwalment, il-Partit Nazzjonalista kien ressaq mozzjoni fil-Parlament biex l-Avviż Legali jkun irrevokat. Meta ttieħed il-vot, id-Deputati kollha tal-Partit Laburista vvotaw kontra l-mozzjoni tal-Oppożizzjoni.
Kien hawn li ħarġet kontra l-Avviż Legali anke l-Assoċjazzjoni Maltija għar-Ristoranti u l-Lukandi tisħaq li dan l-Avviż Legali se joħloq ir-riskju li l-Belt tinbidel f’Paceville ieħor u dan għad-dettriment tal-investiment li l-membri tagħha għamlu fil-Belt Valletta.
Il-Ħadd li għadda, din l-istess gazzetta ppubblikat sondaġġ xjentifiku li juri kif 60% tal-Maltin ma jaqblux ma’ dan l-Avviż Legali.
Aqra hawn aktar dwar ir-raportaġġ tal-ILLUM dwar dan is-suġġett:
