LIVE: Il-Partit Laburista fuq ix-xwiek jistenna r-riżultat tal-elezzjoni interna

Il-Partit Laburista qed jistenna r-riżultat tal-elezzjoni interna li qed iseħħ propju llum is-Sibt • 95.1% tal-votanti reġistrati jitfgħu l-vot tagħhom

14 ta' Settembru 2024 15:59
minn Marianna Calleja

19:13 F’irwoli ta’ Viċi President se jibqa’ Louis Gatt, bħala Segretarju Organizzattiv se jibqa’ l-Perit William Lewis u bħala Segretarja tal-Eżekuttiv Nazzjonali se tibqa’ Catherine Fenech.

Marianna Calleja

19:08 John Grech ġie maħtur Segretarju Internazzjonali tal-Partit Laburista wara li ġab 57.6% tal-voti mixħuta dan wara li minn 721 hu ġab 406 vot.

Georvin Bugeja, il-kandidat l-ieħor għal dan l-irwol, ġab 42.4%.

Marianna Calleja

18:46 Baqa' r-riżultat li se jkun qed jara l-ħatra ta' Segretarju Internazzjonali, rwol ikkontestat minn Georvin Bugeja u John Grech.

Marianna Calleja

18:31 ‘Inħares ’il quddiem’ – Robert Abela

Il-Prim Ministru Robert Abela awgura lil Ian Borg u Alex Agius Saliba li ġew eletti bħala Deputati Mexxejja tal-Partit Laburista.

“Inħares ’il quddiem li flimkien ma’ team b’saħħtu ta’ nies b’esperjenza u oħrajn ġodda, inkomplu niġġeddu,” Abela qal qabel ma fakkar fl-għeluq tal-Konferenza Ġenerali għada fil-Ħamrun.

Marianna Calleja

18:26 Alex Sciberras huwa l-President ġdid tal-Partit Laburista wara li rebaħ l-elezzjoni b'14-il vot biss aktar minn Norma M Saliba. F'elezzjoni fuq xifer ta' sikkina, Sciberras ġab 51% tal-voti, filwaqt li Saliba ġabet 49%.

Marianna Calleja

18:21 ’Nindirizzaw in-nuqqasijiet u nibnu fuq it-tajjeb’ – Alex Agius Saliba

Alex Agius Saliba bena fuq l-argument ta’ Borg, u enfasizza l-bżonn li l-partit ikompli jiġġedded u jisaħħaħ “mhux biss biex il-Partit Laburista jkun lest għal elezzjoni li ġejja, imma biex nisimgħu il-messaġġ li tawna fl-aħħar elezzjoni.”

Huwa fakkar fil-faxxa ta’ nies li qed jiddistintaw ruħhom mil-partiti l-kbar u semma illi għandu jkun ta’ prijorità tal-partit li jiġbed propju din il-faxxa.

Marianna Calleja

18:11 ’Tiġdid importanti’ – Ian Borg

Fl-ewwel kummenti tiegħu lill-midja, bħala d-Deputat Prim Ministru ġdid tal-pajjiż, Ian Borg sejjaħ din l-elezzjoni interna bħala “tiġdid importanti.”

“Flimkien se nkomplu nagħtu l-aħjar politika, bħal ma għamilna fl-aħħar 11-il sena,” Borg qal.

Żied jgħid li se jaħdem bis-sħiħ, flimkien mal-Prim Ministru Robert Abela, biex “itejjeb” il-politika “diġà b’saħħitha.” “Il-Partit Laburista jibqa’ l-akbar forza politika f’Malta,” qal Borg qabel ma rringrazzja lid-delegati għal fiduċja tagħhom.

Marianna Calleja

18:03 Tim wieħed inxammru l-kmiem biex nibqgħu naħdmu Fl-ewwel indirizz tagħhom, Alex Agius Saliba u Ian Borg it-tnejn irringrazzjaw id-delegati u l-attivisti fi ħdan il-Partit Laburista, li “ħarġu bi ħġarhom, sabiex jipparteċipaw f’dan l-eżerċizzju tat-tiġdid.”

Ritratt ta’ ONE News

Marianna Calleja

18:00 Alex Agius Saliba, il-Membru Parlamentari Ewropew, ikkonfermat Deputat Mexxej għall-Affarijiet tal-Partit Laburista. Hu se jieħu post Daniel Micallef wara li ġab b'92.3% tal-voti.

Marianna Calleja

17:44 Bħalissa l-voti tal-ewroparlamentari Alex Agius Saliba qegħdin jiġu ċċekkjati għall-aħħar darba biex issa jibdew jiġu magħduda.

Marianna Calleja

17:10

Il-Ministru għall-Affarijiet Barranin Ian Borg ġie kkonfermat Deputat Mexxej għall-Affarijiet tal-Parlament b’vot ta’ fiduċja ta’ 95.8%. Dan ifisser li b’mod awtomatiku huwa jieħu post Chris Fearne bħala Deputat Prim Ministru. Minn 721 vot, il-Ministru Borg ġab 678 vot iva, 30 le u 13-il astensjoni.

Marianna Calleja

17:00

Ritratti ta’ ONE News | Il-Ministru Ian Borg u l-ewroparlamentari Alex Agius Saliba vvotaw.

Marianna Calleja

16:54 Ejja nagħtu ħarsa ta’ dak li seħħ sa issa, sakemm jiġi konkluż l-ewwel riżultat

Il-Prim Ministru Robert Abela u martu Lydia vvottaw il-Ġimgħa filgħaxija, eżatt wara li ġiet fi tmiemha l-ewwel sezzjoni tal-Konferenza Ġenerali.

Marianna Calleja

16:41 Beda’ l-proċess tal-għadd tal-voti

L-ewwel voti li qed jiġu mgħoddija huma dawk tal-Ministru għall-Affarijiet Ian Borg. F’dan il-każ, minħabba li ma kien hemm l-ebda kandidat ieħor ma’ Borg, id-delegati kellhom jivvottaw ‘iva’ jew ‘le’. Mal-ħin isir l-istess għall-MEP Alex Agius Saliba

Marianna Calleja

16:29 Il-voti li se jikkonfermaw lil Ian Borg u Alex Agius Saliba fil-karigi rispettivi tagħhom issa nġabru f’pakketti ta’ 50 vot. Fil-fatt fi ftit mumenti oħra jibda’ l-għadd ta’ wieħed mill-kandidati.

Marianna Calleja

16:25 L-iktar tellieqa taħraq tal-ġurnata hija bejn l-avukat u eks Sindku tal-Imsida Alex Sciberras u l-eks editur tal-aħbarijiet tal-PBS Norma Saliba għall-president tal-partit. Huwa sigriet miftuħ li l-kap tal-partit Robert Abela kien qed jinbutta lil Saliba.

Marianna Calleja

16:19 Ian Borg, li huwa l-uniku kandidat għall-Deputat Mexxej għall-Affarijiet Parlamentari, u Alex Agius Saliba, l-uniku kandidat għall-Deputat Mexxej għall-Affarijiet tal-partit, għadhom jeħtieġu vot ta’ konferma.

Marianna Calleja

16:16 Il-votazzjoni bdiet ilbieraħ u spiċċat illum fis-2pm. Ftit wara, il-kummissjoni elettorali tal-partit ħabbret li mis-775 delegat eliġibbli biex jivvutaw, 721 tefgħu l-vot tagħhom, għal attendenza ta’ 95.1%.

Marianna Calleja

16:11 Fis-sigħat li ġejjin inkunu nafu r-rizultat tal-elezzjoni interna tal-Partit Laburista. Is-sit ILLUM se jkun qed jirraporta matul il-kumplament tal-ġurnata.

Marianna Calleja

Id-delegati tal-Partit Laburista ħarġu bi ħġarhom biex jivvutaw f’elezzjonijiet interni li mistennija jikkonfermaw liż-żewġ deputati mexxejja ġodda, Ian Borg u Alex Agius Saliba.

Id-delegati se jkunu qed jeleġġu wkoll 12-il membru tal-eżekuttiv tal-partit u jagħżlu l-president li jmiss f’dik li mistennija tkun kompetizzjoni taħraq bejn Alex Sciberras u Norma Saliba.

Elezzjoni oħra mistenni hi għall-kariga ta’ segretarju internazzjonali bejn Georvin Bugeja u John Grech.

Karigi oħra fl-amministrazzjoni tal-partit ma kinux ikkontestati.