[AĠĠORNAT] Il-PN jikkundanna 'nuqqasijiet serji' fis-sigurtà tal-Ajruport, il-PL jirrispondi lura

Dan l-artiklu kien aġġornat, il-Ġimgħa, fis-2:21pm, bil-kummenti min-naħa tal-Partit Laburista

L-Oppożizzjoni qed tikkundanna dak li qed issejjaħ bħala "nuqqasijiet serji" fis-sigurtà fl-Ajruport Internazzjonali ta’ Malta wara li erba’ rġiel ħarbu minn ajruplan tal-linja Turkish Airlines nhar l-Ewwel tas-Sena.

Il-Membru Parlamentari Nazzjonalista Darren Carabott qal li l-fatt li l-Gvern għadu ma ħareġ l-ebda stqarrija uffiċjali dwar dan il-każ huwa "surreali," partikolarment meta żewġ individwi għadhom maħruba.

Carabott qal li għaddew jumejn mill-inċident u la l-Prim Ministru Robert Abela u lanqas il-Ministru għall-Intern u s-Sigurtà Nazzjonali Byron Camilleri għadhom ma għamlu l-ebda dikjarazzjoni pubblika. "Dan huwa każ ta’ importanza nazzjonali fejn nuqqasijiet serji fis-sigurtà tal-pajjiż ġew esposti," qal Carabott.

Huwa akkuża lill-Gvern b’nuqqas ta’ kompetenza u qal li dan hu eżempju ieħor ta’ kif l-amministrazzjoni attwali tipprova taħbi każijiet bħal dawn. Skont Carabott, "l-awtoritajiet qed jiġu mġiegħla jżommu s-skiet fuq dak li ġara permezz ta’ ordni mill-Gvern."

L-inċident seħħ nhar il-Erbgħa wara li ajruplan tal-linja Turkish Airlines ġie Malta għal inżul ta’ emerġenza minħabba li passiġġier irrapporta li kien ma jiflaħx. Skont l-informazzjoni mogħtija mill-Ajruport Internazzjonali ta’ Malta (MIA), il-passiġġier mar l-isptar f’ambulanza taħt sorveljanza tal-pulizija.

Madankollu, ftit wara, erba’ passiġġieri oħra fetħu l-bieb ta’ wara tal-ajruplan mingħajr permess u qabżu fuq l-ajruport qabel ma ħarbu lil hinn mill-ajruport. Il-pulizija kkonfermat li l-erba’ individwi huma kollha ta' nazzjoni Marokkina.

Żewġ persuni ġew arrestati mill-pulizija ftit wara, filwaqt li tnejn oħra għadhom maħruba. L-awtoritajiet qed jappellaw lill-pubbliku għal informazzjoni filwaqt li ppubblikaw ritratti tal-passaporti tagħhom.

L-ewwel stqarrija uffiċjali ma ġietx mill-Gvern iżda mill-Ajruport Internazzjonali ta’ Malta, li kkonferma d-dettalji ta’ kif seħħet il-ħarba u qal li qed jikkopera mal-awtoritajiet fl-investigazzjoni tagħhom. L-ajruport spjega li kienu ġew infurmati minn qabel dwar id-diversjoni medika, u li kienu ħadu miżuri standard, inkluż il-preżenza ta’ membri tal-Forzi Armati ta’ Malta (AFM) fuq il-post.

Minkejja, l-AFM, li hija responsabbli għas-sigurtà fl-ajruport, għadha ma tat l-ebda dettall dwar il-każ.

Deportazzjoni tal-passiġġier u tnejn mill-maħruba

Il-pulizija kkonfermat li l-passiġġier marid, li huwa Marokkin ukoll, ġie deportat lura lejn pajjiżu u mniżżel fil-lista ta’ persuni projbiti milli jidħlu fiż-żona Schengen. L-istess miżura ġiet imposta fuq iż-żewġ persuni arrestati.

Sadanittant, it-tfittxija għaż-żewġ individwi l-oħra għadha għaddejja. Kull min għandu informazzjoni jista’ jgħaddiha lill-pulizija permezz ta’ Messenger jew billi jċempel fuq 21224001/119.

‘Il-PN opportunist u partiġġjan f'kollox’ - Partit Laburista

Min-naħa tiegħu, il-Partit Laburista qal li l-Partit Nazzjonalista beda’ s-sena ġdida b’stqarrijiet mimlija gideb, u maħsuba biex jattakkaw lil min jinvestiga, “taparsi jirringrazzjahom.”

Fi stqarrija, il-Ġimgħa waranofsinhar, il-PL qal li r-riżoluzzjoni tal-PN kienet li jibqa’ l-istess,” filwaqt li akkużah li hu “partiġġjan f’kollox, u opportunist.”

“Meta kulħadd ra stqarrija pubblika tal-Korp tal-Pulizija, il-kelliem tal-Oppożizzjoni ħareġ jigdeb li l-awtoritajiet għandhom xi sarima. Il-Partit Nazzjonalista ma jridx jitgħallem li s-serjetà titlob li investigazzjonijiet ma jsirux bi stqarrijiet partiġġjani u bi statuses partiġġjani imma billi l-awtoritajiet kompetenti jagħmlu xogħolhom f’serenità, dan filwaqt li f’dan il-każ b’għażla injora li hemm terzi privati involuti,”qalet l-istqarrija.