‘Nipproteġu d-Dritt għall-Ġustizzja’: NGOs jipprotestaw r-riforma fl-inkjesti maġisterjali

Seba’ għaqdiet nongovernattivi ngħaqdu għal protesta kontra r-riforma tal-inkjesti maġisterjali, nhar il-Ħadd 16 ta’ Frar, fil-Belt Valletta.

“Il-protesta qed tissejjaħ bil-għan li tfittex li tipperswadi lill-gvern li jwaqqaf id-diskussjoni fil-Parlament fuq l-Abbozz Nru. 125 li jneħħi d-dritt taċ-ċittadini li jitolbu inkjesti maġisterjali. Minflok, qed nitolbu lill-gvern jibda proċess serju ta' konsultazzjoni dwar riformi fis-sistema ġudizzjarja biex isaħħaħ il-kapaċità ta' pajjiżna biex niġġieldu l-korruzzjoni u l-kriminalità organizzata.”

Fl-aħħar ta’ Jannar, il-Gvern ippropona tibdil radikali fil-proċess tal-inkjesti magistrali.

L-Abbozz Nru. 125 ħa jibdel il-mod kif ċittadini u persuni privati jistgħu jitolbu inkjesta maġisterjali. Minflok, skont il-proposta, ċittadini ordinarji jkollhom jibdew billi jagħmlu rapport lill-pulizija u biss wara sitt xhur, jekk il-pulizija ma jkunux ikkonkludew l-investigazzjoni, jistgħu jitolbu lill-Qorti Kriminali biex tevalwa x’livell laħqet l-investigazzjoni.

Imsejħa, “Protesta: Nipproteġu d-Dritt għall-Ġustizzja,” il-protesta hija organizzata bil-għan “li tipperswadi lill-gvern iwaqqaf id-diskussjoni fil-Parlament fuq l-Abbozz Nru. 125.”

Il-protesta organizzata minn Repubblika u #occupyjustice nhar il-Ħadd, 16 ta' Frar fl-4 p.m.

Il-protesta qed isseħħ ukoll bil-għan li tikkonvinċi lill-gvern biex “jibda proċess serju ta' konsultazzjoni dwar riformi fis-sistema ġudizzjarja biex il-ġlieda kontra l-korruzzjoni u l-kriminalità organizzata tissaħħaħ.”

“Ma nistgħux nifhmu l-għaġla tal-gvern li jrid jimponi din il-liġi mingħajr ebda forma ta' djalogu pubbliku,” stqarret Repubblika fi stqarrija l-Ħamis filgħodu.

Huma wkoll ċaħdu x-xilja tal-gvern li l-pożizzjoni tagħhom hija “waħda estremista”.

“F'demokrazija, id-difiża paċifika tad-drittijiet taċ-ċittadini kollha ma tista' qatt tissejjaħ estremista,” tkompli l-istqarrija ta’ Repubblika.

AQRA WKOLL: Koalizzjoni ta' NGOs titlob lill-Gvern biex jippubblika l-White Paper dwar ir-riforma tal-inkjesti maġisterjali

Minkejja l-organizzazzjoni tal-protesta, l-organizzazzjonijiet involuti xorta waħda wrew qbil ma’ wħud mir-riformi proposti fil-liġi, speċifikament dawk il-proposti li jtejbu d-drittijiet tal-vittmi waqt li jkunu għaddejjin l-inkjesti.

Il-protesta ħa ssir nhar il-Ħadd fl-4pm quddiem il-bini tal-Parlament.

L-organizzazzjonijiet involuti huma Repubblika, #occupyjustice, Aditus Foundation, The Daphne Caruana Galizia Foundation, PEN Malta, l-Għaqda Studenti tal-Liġi, u Vuċi Kollettiva.