Il-Parlament Malti approva r-riforma kontroversjali dwar l-inkjesti maġisterjali wara li l-abbozz tal-liġi għadda mit-tielet qari.
Fit-2 ta' April 2025, hekk kif quddiem il-Parlament inġabru numru ta' dimostranti, is-37 Membru Parlamentari tal-Gvern vvutaw favur l-abbozz u t-30 Membru Parlamentari tal-Oppożizzjoni vvutaw kontra.
Din ir-riforma, imsejħa Abbozz Nru 125, ħa ġġib tibdil sinifikanti fil-mod kif iċ-ċittadini jistgħu jitolbu inkjesti maġisterjali. Fejn qabel ċittadin seta' jmur dirett għand maġistrat u jitlob għal inkjesta, issa għandu jmur għand il-pulizija u jagħmel rapport. Iċ-ċittadin ikun jista' jagħmel rikors għall-Qorti wara li jkunu għaddew sitt xhur, fejn hemm ċans li ma tinħatarx l-inkjesta.
It-Tlieta, il-Membri Parlamentari ddibattew u għamlu emendi żgħar fir-riforma. Fosthom kien hemm it-tneħħija tas-superviżjoni tal-Avukat Ġenerali fuq il-ħatra ta’ esperti tal-qorti.
Fil-verżjoni emendata, il-ħatra tal-esperti issa se tkun f’idejn il-maġistrat inkwirenti u l-Prim Imħallef biss. L-inklużjoni tal-Avukat Ġenerali fil-proposta oriġinali kienet ġiet ikkritikata għax kienet tnaqqas mill-awtonomija tal-maġistrat.
