Mobile App għall-Park tal-Majjistral

Iktar kmieni llum il-Majjistral - Park ta' Natura u Storja nieda l-mobile application uffiċjali. Il-mobile app kien żvilluppat min tim ta' studenti żgħażagħ wara sejħa għall-proposti mill-MITA Innovation Hub. L-App kienet imnedija minn Leo Brincat u minn Jose Herrera

Żewġ timijiet intgħażlu biex jaħdmu fil-MITA Innovation Hub fi SmartCity Malta biex jaħdmu flimkien u joħolqu mobile app għall-Park. Dan it-tim kien magħmul minn erba' studenti. Elisa Calleja ħadmet fuq id-disinn tal-app filwaqt li Kurt Dalli, Nicholas Galea u James Zammit żvillupaw is-software. Matul it-tliet xhur tas-sajf l-istudenti kienu mgħejuna minn professjonisti tal-MITA, għalliema mill-Università ta' Malta u mill-Microsoft Innovation Centre.

L-app għandha disinn li jolqtok u tikkonsisti minn funzjonijiet li joffru lill-viżitaturi tal-Park esperjenza sabiħa. Fost l-oħrajn, l-app tista' tgħin lil dak li jkun biex jiddentifika l-ispeċi differenti ta' flora u fawna li jinsabu fil-Park, tipprovdi informazzjoni edukattiva dwarhom, tgħinhon jagħżlu rotot li jistgħu jsegwu u jirrapurtaw attivitajiet illegali permezz tal-email. L-app tista' titniżżel b'xejn mill-Apple App Store u Google Play. 

Wara t-tnedija tal-app, il-Park Majjistral organizza open day għal kullħadd u nieda kompettizzjoni tal-fotografija. Il-parteċipanti jridu jużaw il-mobile app sabiex jieħdu ritratti tal-Park u jibgħatuhom fuq il-paġna tal-Facebook tal-Park.