L-Isqfijiet Maltin Paul Darmanin u Joe Alessandro, li t-tnejn jaħdmu fil-Kenja, il-post fejn ftit tal-jiem ilu ġew maqtula u feruti mijiet ta’ nies f’Garissa, jinsabu Malta għal ftit jiem qabel ma huma se jmorru Ruma biex jiltaqgħu mal-Papa Franġisku. Fil-Fatt, l-Isqof Joe Alessandro ilbieraħ kien il-mistieden tal-programm Dissett li xxandar fuq TVM bi preżentazzjoni ta’ Reno Bugeja.
Jidher iżda li mhux kulħadd kien infurmat bil-wasla tal-Isqfijiet Darmanin u Alessandro f’Malta u fost dawn kien hemm l-Isqof t’Għawdex Mario Grech li minn naħa tiegħu bagħat ittra lill-Provinċjal tal-Partijiet Franġiskani.
Intant, l-istess Isqfijiet Darmanin u Alessandro dalgħodu huma mistennija li jkollhom laqgħa mal-Arċisqof Charles J Scicluna u li għal din il-laqgħa ġiet mistiedna l-midja.
L-ittra tal-Isqof Grech tinsab hawn taħt:
Il-W.R. Patri Martin Micallef ofmcap
Provinċjal tal-Patrijiet Franġiskani Kapuċċini Maltin
9 ta’ April 2015
Għażiż Provinċjal,
Illejla sirt naf, purtroppo mill-Media, li waslu f’pajjiżna l-Isqof Paul Darmanin u l-Isqof Joe Alessandro. Meta dan l-aħħar segwejna l-inċidenti vjolenti li ferew gravament il-komunità ekkleżjali tagħhom, aħna ħassejna rwieħna viċin ħafna tagħhom. Jekk jogħġbok, nitolbok twasslilhom it-tislijiet fraterni tiegħi personali u tal-Knisja f’Għawdex. Kif jista’ jikkonferma l-Isqof Darmanin, ir-rabtiet bejn il-komunità Nisranija f’Għawdex u dik ta’ Garissa jmorru lura fis-snin. Fi spirtu ta’ solidarjetà magħhom u mal-Knisja fdata fil-kura pastorali tagħhom, aħna nwegħduhom li nitolbu magħhom għall-paċi f’pajjiżhom. Inħoss li għandi nirringrazzjahom għax-xhieda tagħhom.
Mario Grech
Isqof ta’ Għawdex
