Minn dokumenti ta' kumpanija kbira li tinvesti l-miljuni fit-trasferimenti tal-plejers tal-futbol, li nkixfu, jidher li Doyen Sports Investments li għandha l-bażi f'Malta, qed tagħmel qligħ ta' miljuni kbar minn prattika li issa ġiet imwaqqfa mill-FIFA.
Din il-kumpanija u oħrajn bħalha, iħallsu timijiet sabiex jagħżlu plejer partikolari biex jingħaqad magħhom, u fl-istess waqt jagħmlu l-imħatri tagħhom li l-valur ta' dan l-istess plejer ikun se jogħla. B'hekk, kumpaniji bħal Doyan Sports jagħmlu profitt qawwi meta l-plejer jiċċaqlaq minn tim għall-ieħor.
Dawn it-tip ta' kumpaniji saru sors ewlieni ta' introjtu għal bosta klabbs tal-futbol li jkollhom xi problemi finanzjarji.
Dawn it-trasferimenti jammontaw għal miljuni kbar ta' euro, bil-kumpanija tinvesti mal-€25m għad-drittijiet tat-trasferimenti ta' seba' plejers. Fost dawn il-plejers, wieħed isib fost l-aqwa u l-aktar plejers li jiswew flus, bħall-Brażiljan Neymar, li għalih il-kumpanija ħallset €6m lura fl-2012 u l-Kolombjan Radamel Falcao li għal sehem fit-trasferiment tiegħu, Doyen ħallsu €10m.
Is-sena li għaddiet, FIFA, li hija l-organizazzjoni dinjija li tirregola l-futbol, ipprojbixxew li investituri jixtru sehem mid-drittijiet ta' trasferimenti ta' plejers tal-futbol, ħaġa li hija l-investiment prinċipali ta' kumpaniji bħal Doyen. Minħabba f'hekk, il-kumpanija qed tfittex li tiġi revokata din il-klawsola fil-Qorti.
Dawn l-istess dokumenti li nħarġu, li dehru fuq is-sit Bloomberg, juru kif il-kumpanija Doyen Sports hija reġistrata f'Ta' Xbiex, bil-parti tagħha ta' Doyen Marketing tkun ibbażata f'Tas-Sliema.
.jpg)
