Tfajla Taljana ġiet maħtufa minn żewġt irġiel barranin waqt li kienet fl-inħawi tal-bajja ta’ San Ġorg, San Ġiljan, fejn wara ttieħdet b'karozza f'Pembroke u allegatament ġiet struprata fl-istess karozza miż-żewġt irġiel.
Il-Pulizija mill-għassa ta' San Giljan, ġiet infurmata kmieni dalgħodu bil-każ, fejn marru immedjatament fuq il-post, fejn minn stħarrig illi għamlu rriżulta li żewg persuni ħatfu tfajla u saqu lejn id-direzzjoni ta’ Pembroke. Bl-għajnuna tal-persuni li kien hemm fuq il-post, ġiet identifikata l-vettura li kienu qegħdin jużaw dawn iż-żewġ persuni u l-Pulizija telqu minnufih fid-direzzjoni indikata.
Malli l-Pulizija waslu fl-akwati ta’ Pembroke, ġiet innutata vettura pparkjata, bħal dik li kienet ġiet deskritta minn xi nies fuq il-post tal-inċident aktar qabel. Ħdejn il-vettura kien hemm raġel jippassiġġa li malli ra lill-Pulizija, ħarab jiġri minn fuq il-post, iżda ġie arrestat ftit wara.
Il-Pulizija innutaw li fil-vettura kien hemm raġel ieħor kif ukoll tfajla. Għaldaqstant ir-raġel ġie miżmum mill-Uffiċjali tal-Pulizija filwaqt li issejħet ambulanza sabiex tieħu lit-tfajla l-Isptar Mater Dei ħalli tingħata l-kura meħtieġa peress li hija allegat li kienet ġiet stuprata miż-żewġt irġiel.
L-irġiel li l-età tagħhom hija ta’ bejn it-34 u s-36 sena u li huma minn Niġerja u Burkina Fazo, qegħdin jinżammu mill-Pulizija sabiex jassistu fl-investigazzjonijiet. Il-vittma li għandha 30 sena u li hija Taljana għadha qed tinżamm l-Isptar filwaqt li hija ukoll qegħda tassisti lill-Pulizija fl-investigazzjoni tagħha.
Bil-każ ġiet infurmata ukoll il-Maġistrat tal-Għassa Dr C. Galea LLD li ordnat li ssir inkjesta u ħatret diversi esperti sabiex jassistuha.
.jpg)
