Dar Emmaws hija l-ewwel shelter residenzjali għall-vittmi ta’ vjolenza domestika f’Għawdex li qed tiftaħ kapitlu ġdid fil-ħajja tagħha. Il-fondazzjoni Kenn u Tama li tmexxi din id-dar għadha kemm iffirmat ftehim ta’ public-private partnership mal-Ministeru għal Għawdex u l-Ministeru għall-Familja u Solidarjetà Soċjali li bih Dar Emmaws se tkun amministrata minn Bord ta’ Tmexxija.
Apparti s-shelter ta’ emerġenza u residenza temporanja Dar Emmaws se tibda toffri għajnuna soċjali, emozzjonali, psikoloġika u ħarsien tas-saħħa lil dawk il-persuni kollha li jiġu bżonn dan it-tip ta’ kenn. Għal dan il-għan, Dar Emmaws qed tqiegħed għad-dispożizzjoni tal-Ministeru għall-Familja u Solidarjetà Soċjali s-sular terran tagħha biex fih jitwaqqaf Ċentru tar-Riżorsi għall-Familja.
Il-Fondazzjoni Kenn u Tama fetħet Dar Emmaws f’April 2014. Il-bżonn għal dan it-tip ta’ servizz kien ilu jinħass f’Għawdex, sewwa għall-Għawdxin u sewwa għal Maltin u/jew barranin li jfittxu kenn f’Għawdex. Dakinhar, Dar Emmaws kienet għadha qed timraħ f’ibħra ġodda. Irriżulta li d-domanda għal dan is-servizz kienet qawwija ferm aktar milli Dar Emmaws setgħet tipprevedi. Biżżejjed ngħidu li f’sentejn, offriet aktar minn 2,000 lejl ta’ kenn.
Bis-saħħa ta’ dan il-ftehim, il-Fondazzjoni issa qed tara li mhux biss toffri l-kenn temporanju jew ta’ emerġenza imma toffri wkoll l-għajnuna biex il-vittmi jkunu jistgħu jqumu fuq saqajhom u jaffrontaw id-dinja. It-twaqqif taċ-Ċentru tar-Riżorsi tal-Familja f’Dar Emmaws huwa mmirat biex itejjeb u jżid is-servizzi ta’ għajnuna – li wħud minnhom mhumiex preżenti f’Għawdex, jagħmel użu aħjar u aktar effettiv mir-riżorsi umani, u jagħmel qabża ta’ kwalità fl-isforzi biex persuni vulnerabbli jiġu integrati mill-ġdid, aktar b’saħħithom, fis-soċjetà.
Il-Ministru għal Għawdex Anton Refalo tenna l-importanza ta’ din id-dar li qed toffri kenn lil min hu fil-bżonn. Huwa stqarr li permezz ta’ dan il-ftehim aktar nies ser ikunu offruti l-kenn. Il-Ministru rringrazzja lill-Ministru Farrugia tas-sostenn filwaqt li kellu kliem ta’ tifħir lil dawk li b’tant għożża qed imexxu lil Dar Emmaws.
Minn naħa tiegħu, il-Ministru għall-Familja u Solidarjetà Soċjali Michael Farrugia qal illi din hija Public Social Partnership oħra minn kullana ta’ PSP ħalli jissaħħaħ is-servizz tal-welfare f’pajjiżna. Huwa qal illi meta fix-xhur li ġejjin jitlestew il-finishings fis-sular ta isfel ta’ din il-binja se jinfetaħ Ċentru tal-Leap li se jinkorpora fih Family Resource Centre.
‘Għalhekk nies vulnerabbli li jkunu qed jużaw is-servizzi tal-Emergency Shelter se jkollhom is-servizzi ta’ terapija kollha taħt saqaf wieħed. Dan il-Family Resource Centre mhux ħa jkun għall-użu esklussiv tal-utenti ta’ shelter imma għall-Komunità Għawdxija inġenerali’ qal il-Ministru Farrugia.
‘Nieħu din l-opportunità biex nirringrazzja lill-Ministru Anton Refalo, lill-Fondazzjoni Kenn u Tama, b’mod speċjali lil Mons. Joe Vella Gauci u Dun Mikiel Xuereb’ temm jgħid il-Ministru Michael Farrugia.
.png)
