Aktar kmieni llum, attivisti involuti fil-Kamp Emerġenza Ambjent fetħu l-aċċess għal Manoel Island u se jkunu qegħdin jikkampjaw hemmhekk s’għada, quddiem il-fortizza Manoel, sabiex jiżguraw li l-aċċess jibqa’ miftuħ.
Illum.com.mt tkellem ma’ Andre Callus, mill-moviment Graffiti li qal li l-iskop ta’ din l-azzjoni huwa li jinfetaħ l-aċċess għall-kosta madwar Manoel Island, li ġie magħluq mill-MIDI 16-il sena ilu.
L-Attivisti qegħdin isostnu li jekk il-MIDI jerġgħu jagħlqu l-aċċess, din l-azzjoni se titrrepeti ruħha, għaliex Manoel Island għandħa titgawda mill-pubbliku, li llum huwa mistieden iżur il-gżira.
Ċittadini urtati b’din is-sitwazzjoni ta’ nuqqas t’aċċess ipparteċipaw f’din l-azzjoni b’appoġġ mill-Moviment Graffitti, Żminijietna, Friends of the Earth – Malta, Flimkien għal Ambjent Aħajr, u Ramblers Association Malta, bis-sapport tas-Sindku u l-Kunsill Lokali tal-Gżira.
Fi stqarrija tal- Kamp Emerġenza Ambjent intqal li “Qabel mal-gvern ta l-Manoel Island bħala konċessjoni lill-MIDI, in-nies setgħu jidħlu mingħajr xkiel u ħafna għandhom memorji assoċjati ma' dan il-post; post li joffri spazju miftuħ f’żona b’ħafna bini u konġestjoni. Huwa tal-mistħija li l-MIDI tħalla jagħlaq l-aċċess għall-kosta u li qed juża l-Manoel Island, inkluża l-fortizza storika tiegħu, esklussivament għal attivitjiet privati bi ħlas”
Din l-azzjoni qed issir fid-dawl li l-MIDI ma jistgħux jagħlqu dan l-aċċess ghaliex kif inhu mniżżel fil-konċessjoni li ngħatat lilhom mill-gvern, huma m’għandhom l-ebda dritt li jagħlqu l-aċċess għal Manoel Island.
L-Att dwar id-Demanju Pubbliku jistipula wkoll li l-kosta għandha tiġi awtomatikament ikkunsidrata bħala demanju pubbliku u għalhekk l-aċċess għaliha ma jistax jiġi mċaħħad.
“Għaldaqstant Manoel Island għandha tingħata lura lill-poplu u li għandha ssir spazju rikreattiv li jitgawda minn kulħadd”
.jpg)
