Ix-xogħol ta’ manutenzjoni estensiv fil-Kumpless tal-Pixxina Nazzjonali f’Tal-Qroqq issa jinsab lest. Fil-fatt il-Kumpless Sportiv reġa’ fetaħ il-bibien tiegħu din il-ġimgħa għall-clubs tal-waterpolo, kif ukoll għan-numru ta’ assoċjazzjonijiet u klijenti li jużaw dan il-post.
“Li tkun indirizzata l-problema enormi ta’ telqa u abbandun li kienet ilha takkumula għal dawn l-aħħar għoxrin sena u r-riġenerazzjoni tal-Pixxina Nazzjonali kienet wegħda ta’ dan il-Gvern,” qal s-Segretarju Parlamentari għar-Riċerka, Innovazzjoni, Żgħażagħ u Sport Chris Agius waqt l-inawgurazzjoni tal-pixxina. Huwa kompla jgħid li fl-aħħar snin ġew investiti ’l fuq minn tliet miljun ewro fuq dan il-kumpless.
L-ewwel fażi kienet tkopri l-aktar xogħol urġenti, fejn saret manutenzjoni fuq is-South Block u nbnew mill-ġdid iċ-changing rooms.
Wara segwiet it-tieni fażi li kienet tinkludi t-tibdil tal-heating system, umaintenance tal-boiler, tibdil ta’ pompi fil-Plant Room u s-sistema tal-greywater. Saret ukoll sistema ta’ arja kundizzjonata aktar effiċjenti fl-uffiċini, l-installazzjoni ta’ pool covers u sistema ġdida ta’ tisħin ta’ ilma bir-raġġi tax-xemx. Dan sar sabiex jitnaqqas l-użu tal-fuel u l-kumpless ikun aktar effiċjentifl-użu tal-enerġija. Barra minn hekk inbidlu wkoll il-handrails kollha li jdawru l-pixxina.
It-tielet fażi tar-riġenerazzjoni tal-Pixxina Nazzjonali kopriet il-manutenzjoni taż-żewġ pixxini flimkien u t-tibdil tal-madum tad-deck. Dan tal-aħħar kien fi stat gravi tant li kien ta’ periklu għal min kien qed juża din il-facilità. B’hekk il-Gvern wettaq il-wegħda tiegħu u issa jista’ jkompli jiffoka fuq wegħda oħra li hija dik tal-pixxina magħluqa fil-Kottonera. Dan l-impjant huwa ferm mistenni mill-komunità akkwatika f’Malta, u l-pjanijet tal-Gvern huma li x-xogħlijiet jibdew sal-aħħar ta’ din is-sena.
Iċ-Chairman ta’ SportMalta, Luciano Busuttil semma kif SportMalta rat li l-flus kollha investiti f’dan il-proġett isarrfu f’xogħol tajjeb. Huwa spjega kif fejn kien hemm bżonn, reġa’ sar ix-xogħol biex ikollna żgur faċilità denja għall-isport Malti u dawk kollha li jużawha.
Dermot Galea, il-Kap tal-Faċilitajet Sportivi ta’ SportMalta elenka fid-dettall ix-xogħol kollu li sar filwaqt li l-President tal-ASA Joe Caruana Curran irringrazzja lil SportMalta u lill-Gvern tal-ħidma biex pajjiżna issa qed igawdi minn faċilità tal-ogħla livell.
Waqt iċ-ċerimonja tal-ftuħ saret esebizzjoni mill-istudenti tal-akkademja taż-żfin sinkronizzat ta’ SportMalta, kif ukoll turnament tal-waterpolo bejn il-clubsewlenin u t-team nazzjonali tan-nisa.
