Il-lokalità tas-Swieqi kienet l-iktar waħda li rreġistrat żidiet fejn għandhom x’jaqsmu r-residenti tagħha li huma Maltin. Fil-fatt, statistika ppubblikata f’rapport tal-Uffiċċju Nazzjonali tal-Istatistika turi kif minbarra s-Swieqi, il-lokalità ta’ San Ġiljan kienet it-tieni waħda li laqgħet fiha l-akbar ammont ta’ Maltin fiha. Il-maġġoranza tal-lokalitajiet l-oħra raw żidiet ta’ inqas minn 5%, waqt li 24 lokalitajiet irrappurtaw tnaqqis tal-popolazzjoni ta’ Maltin.
Min-naħa l-oħra, meta wieħed jikkunsidra l-persuni barranin li qegħdin jgħixu f’pajjiżna, sal-2015, il-lokalitajiet ta’ Birżebbuġa, San Pawl il-Baħar u Tas-Sliema kellhom iktar minn 20% tal-popolazzjoni tagħhom magħmula minn persuni mhux Maltin. Fl-istess waqt, il-lokalitajiet li kellhom l-inqas persentaġġ ta’ barranin fil-popolazzjoni tagħhom kienu Santa Luċija, iż-Żejtun u Ħaż-Żabbar.
Meta wieħed jikkunsidra l-bidliet fil-popolazzjoni b’mod ġenerali fil-pajjiż, ġie nnutat li l-aktar lokalitajiet bl-ogħla rata ta’ tkabbir ġenerali tal-popolazzjoni kienu s-Swieqi, Birżebbuġa, Tas-Sliema u San Ġiljan, b’rati ta’żieda ta’ 15% jew iktar. Fl-istess waqt, il-lokalitajiet tal-Imdina, l-Għasri f’Għawdex u r-raħal ta’ Ħal Luqa kellhom l-akbar tnaqqis fil-popolazzjoni tagħhom.
Fl-istatistika li tikkonċerna r-reġjun ta’ Għawdex u Kemmuna, kienet il-lokalità ta’ San Lawrenz li rat l-akbar tkabbir fil-popolazzjoni tagħha, waqt li l-Għasri, ir-Rabat, in-Nadur u l-Fontana kienu fost dawk li kellhom tnaqqis fl-ammont ta’ persuni li jirrisjedu fihom, meta jitqies il-perjodu kkonċernat.
Fl-istess rapport ta’ statistika maħruġ mill-NSO, intefa’ dawl ukoll fuq il-popolazzjoni ġenerali tal-pajjiż. Fil-fatt, il-popolazzjoni totali tal-pajjiż sa tmiem l-2015 kienet tlaħħaq l-434,403, b’402,720 minnhom ikunu jirrisjedu f’Malta, waqt li 31,683 joqogħdu Għawdex u Kemmuna.
Minn fost dawn, il-grupp ta’ età l-iktar popolari f’Malta huwa dak ta’ bejn it-30 u d-39 sena, li jammontaw għal ftit inqas minn 15% tal-popolazzjoni. Fl-istess waqt, f’Għawdex, l-aktar grupp tal-età popolari huwa dak ta’ bejn il-50 u d-59 sena, li waħdu jlaħħaw il-15% tal-popolazzjoni Għawdxija kollha.
Ta’ min wieħed jinnota li fil-perjodu ta’ bejn l-2010 u l-2015, il-popolazzjoni ta’ Malta, dejjem rat żieda fin-numri tagħha, bir-rata totali ta’ tkabbir laħqet ftit iktar minn 19,000 persuna. L-ikbar tkabbir fil-popolazzjoni seta’ jiġi nnutat fir-reġjun tat-Tramuntana tal-pajjiż, li jinkludi fih lokalitajiet bħall-Mellieħa, San Pawl il-Baħar, l-Imġarr u n-Naxxar, bi tkabbir ta’ 7.7%.
Is-sitwazzjoni f’Għawdex kienet simili hekk kif il-gżira rreġistrat tkabbir kull sena fil-perjodu indikat, għajr għall-2013, meta Għawdex kien ra tnaqqis marġinali fil-popolazzjoni tiegħu.
.jpg)
