Il-Ministru tal-Finanzi Clyde Caruana ħabbar fid-diskors tal-baġit tiegħu t-Tnejn, numru ta’ inizjattivi mmexxija mill-Gvern li għandhom l-għan li jsaħħu diversi setturi tal-industrija.
L-inizjattivi jimmiraw lejn l-industriji tal-manifattura u tas-servizzi finanzjarji, kif ukoll in-negozji tal-familja, il-kiri tal-ajruplani u l-green bonds.
Għotjiet ta’ €40 miljun fi flus għall-SMEs
Total ta' €40 miljun għandhom jingħataw fi flus lil intrapriżi żgħar u ta' daqs medju (SMEs) taħt l-iskema Business Enhance. Dawn l-għotjiet huma mmirati lejn startups, biex jgħinuhom jiżviluppaw, jiddiversifikaw u jilħqu swieq ġodda. Intrapriżi żgħar u ta' daqs medju għandhom ikomplu jibbenefikaw minn verifiki tal-enerġija b'xejn.
Se jiġu investiti strumenti finanzjarji għall-fondi tal-UE biex jassistu lin-negozji Maltin ta’ daqs żgħir u medju billi jiffaċilitaw l-aċċess tagħhom għall-finanzjament mill-banek lokali, billi jitnaqqsu r-rati tal-imaxx u r-rekwiżiti kollaterali.
Se jkunu disponibbli total ta’ €16.5 miljun se jkunu disponibbli għall-SMEs hekk kif ġie allokat €9.5 miljun mill-Fond Ewropew għall-Iżvilupp Reġjonali u madwar €7 miljun f’rifużjoni mill-iskema JEREMIE (Riżorsi Ewropej Konġunti għall-Intrapriżi Mikro sa Medji).
“In-negozji tal-familja huma s-sinsla tal-ekonomija,” qal Caruana, waqt li ħabbar estensjoni fuq il-konċessjoni tat-taxxa li tnaqqas it-taxxa tal-boll minn 5% għal 1.5% meta n-negozji tal-familja jiġu trasferiti lill-ulied mill-ġenituri meta jkunu għadhom ħajjin.
In-negozji tal-familja li huma reġistrati bħala tali se jibbenefikaw mill-limitu iktar ogħli minn kreditu tat-taxxa fuq investimenti li jsiru fin-negozji tagħhom. Il-Ministru wiegħed li se jara li l-charters tal-familja huma rikonoxxuti mil-liġi u regolati b’mod xieraq bħala kuntratti speċjali u li n-negozji tal-familja jibbenefikaw minn inċentivi fiskali hekk kif jinternazzjonalizzaw, jinnovaw u jiddiġitalizzaw.
Se jiġu estiżi wkoll għadd ta’ skemi eżistenti oħra mmirati biex isaħħu l-intrapriżi, bħall-Iskema ta’ Żvilupp tal-Ħiliet, l-Iskema ta’ Sussidju għall-Kera, l-iskema Innovate u l-iskemi ta’ Għajnuna għall-Investiment Smart & Sustainable u għal Proġetti ta’ Effiċjenza fl-Enerġija.
ST Microelectronics se tibbenefika minn investiment ta’ bosta miljuni ta’ ewro
Tħabbar investiment ieħor ta' bosta miljuni ta' ewro fil-produttur ta' komponenti elettroniċi ST Microelectronics biex iżżid il-kapaċità ta' manifattura tagħha taħt l-Att dwar iċ-Ċipep Ewropew. Il-produzzjoni lokali tal-microchip hija industrija ta’ €600 miljun, qa Caruan, hekk kif ħabbar li Malta ssieħbet ma’ Franza u l-Italja biex iżżomm l-operat tal-manifattura ta’ ST ġewwa l-UE b’reazzjoni għal offerta tal-Istati Uniti mmirata biex tattira manifatturi tal-microchip biex jirrilokaw madwar l-Atlantiku.
Caruana ddeskriva l-industrija tal-microchip bħala waħda strateġika fl-ekonomija globali. Is-settur jimpjega 'l fuq minn 1,800 ħaddiem f'Malta u jirriżulta f'esportazzjoni ta' aktar minn €600 miljun. Huwa qal li f’Ġunju li għadda, il-Kummissjoni Ewropea ħabbret li proġett konġunt mill-Malta Enterprise u ST Malta kien wieħed minn 55 proġett strateġiku magħżula bħala Proġetti Importanti ta’ Interess Komuni Ewropew (IPCEI), li għandu jwassal għal aktar investiment u innovazzjoni fis-setturi tal-microchip f’Malta.
Is-sena d-dieħla l-Gvern se jkun qed jibni fuq l-Istrateġija tas-Servizzi Finanzjarji ta’ Malta, pjan fit-tul, li tnieda aktar kmieni din is-sena, maħsub biex jagħti ħajja ġdida u jittrasforma s-settur tas-servizzi finanzjarji billi jibni fuq il-pedamenti stabbiliti u r-reputazzjoni soda ta’ Malta fis-settur.
“Din l-istrateġija se twassalna biex nagħmlu lil pajjiżna ġurisdizzjoni finanzjarja sostenibbli, fejn huwa faċli li tmexxi n-negozju, timmaniġġja t-tkabbir u l-innovazzjoni fis-settur,” qal Caruana, filwaqt li żied jgħid li fit-18-il xahar li ġejjin, il-Gvern se ikun qed jaħdem qatiegħ dwar l-implimentazzjoni ta’ numru ta’ prijoritajiet.
