Il-membri tat-Tribunal Industrijali ta’ Malta pprotestaw kontra kawża kostituzzjonali mressqa mill-Union tal-Edukaturi Professjonali (UPE) kontrihom.
Iċ-Chairperson Harold Walls u ż-żewġ membri tat-Tribunal qalu lill-Prim Ministru Robert Abela f’ittra, li kienu ħaduha bħala offiża li nżammu responsabbli fit-talba tal-Qorti tal-UPE li kienet ippreżentata mill-avukati Jason Azzopardi u Therese Comodini Cachia.
Il-UPE għandhom dritt li jressqu każ kostituzzjonali dwar kwalunkwe ksur allegat ta’ drittijiet, iżda l-membri tat-Tribunal qalu li jinsabu mħassba li qed jinżammu responsabbli. Huma komplew jgħidu li l-indipendenza u l-imparzjalità tal-membri tat-Tribunal Industrijali huma salvagwardjati bil-liġi u li qatt ma ntalbet rikuża.
Walls qal lil Abela li huwa inaċċettabbli li l-UPE ma qablitx mad-deċiżjoni tat-Tribunal u minħabba dan il-membri tiegħu se jkollhom jaffaċċjaw sfida kostituzzjonali.
It-Tribunal mhuwiex magħmul minn imħallfin jew maġistrati, iżda l-membri maħtura qalu li jaqdu rwoli kważi-ġudizzjarji. Walls saħaq li minħabba din ir-raġuni, l-membri ma jistgħux jiġu mħarrka individwalment biex ikunu salvagwardjati meta jaqdu dmirijiethom.
Walls qal li l-ebda imħallef jew maġistrat qatt ma kien imfittex personalment dwar xi sentenza tal-qorti. Huwa kompla jgħid li dan għandu jgħodd għall-membri ta’ dan it-Tribunal skont kif hemm miktub fil-liġi li tipproteġi lil dawn il-membri maħtura f’tribunali, qrati, jew bordijiet li jieħdu deċiżjonijiet.
Fil-kawża oriġinali, ippreżentata mill-UPE kontra d-Direttorat għas-Servizzi Edukattivi, ir-rappreżentanti legali tal-union oġġezzjonaw għall-ewwel żewġ membri tat-tribunal, ma oġġezzjonawx għall-preżenza ta’ Lawrence Mizzi u Bryony Balzia Bartolo bħala membri tat-Tribunal u lanqas talbu r-rikuża tagħhom. Għalhekk jinsabu sorpriżi b'dan l-attakk, peress li huwa mmirat lejhom personalment saħaq Walls.
Il-kawża kostituzzjonali, li se tinstema’ f’Jannar 2024, ġiet ippreżentata mill-UPE kontra l-Avukat tal-Istat, id-DES, id-direttur tar-relazzjonijiet industrijali u tax-xogħol, kif ukoll Harold Walls, Lawrence Mizzi u Bryony Balzia Bartolo.
