Malta bl-għola żieda ta' emissjonijiet mill-pajjiżi tal-UE

Statistika riċenti maħruġa mill-Eurostat dwar it-tieni kwart tal-2023 żvelat għarfien dwar l-emissjonijiet tal-gassijiet serra madwar l-Unjoni Ewropea. Filwaqt li l-ekonomija ġenerali tal-UE esperjenzat tnaqqis ta’ 5.3% fl-emissjonijiet tal-gassijiet serra meta mqabbla mal-istess perjodu fl-2022, Malta spikkat b’żieda ta’ 7.7%, l-għola żieda mill-pajjiżi Ewropej kollha.

L-informazzjoni turi ukoll żieda ta’ 3.9% fil-Prodott Gross Domestiku (PGD) ta’ Malta matul dan il-perjodu, li tista' tagħti indikazzjoni għalfejn Malta kklasifikat fl-ewwel post.

Dan jikkuntrasta max-xejra akbar li dehret fl-UE, fejn l-emissjonijiet naqsu f’21 pajjiż membru.

Ir-rapport enfasizza li fost is-sitt nazzjonijiet tal-UE li wrew żieda fl-emissjonijiet, erbgħa, inkluż Malta, irreġistraw tkabbir fil-PGD. Dan huwa f'kuntrast mal-maġġoranza tal-pajjiżi tal-UE fejn it-tnaqqis fl-emissjonijiet kien akkumpanjat minn ċifri tal-PDG jew staġnati jew jonqsu.

Madankollu, ta’ min jinnota li Malta kienet fost minoranza ta’ pajjiżi li esperjenzaw żieda qawwija fl-emissjonijiet matul dan il-perjodu.

B'kuntrast, pajjiżi oħra tal-UE, bħall-Bulgarija, l-Estonja, u l-Olanda, irreġistraw tnaqqis sinifikanti fl-emissjonijiet tal-gassijiet serra, bi tnaqqis ta' 23.7%, 23.1%, u 10.3% rispettivament.