Malta rreġistrat żieda ta’ 5.7% fin-numru ta’ twelid irreġistrat, hekk kif l-2023 laqgħet 4,204 tarbija mwielda f’Malta.
Fi stqarrija, Identità qalet li dan jirrappreżenta żieda ta’ 226 tarbija meta mqabbel mas-sena ta’ qabel. Mit-total ta’ twelid, 2,162 minnhom kienu subien, filwaqt li l-bniet kienu jiffurmaw l-2,042 li kien fadal. Fl-2023, ġew irrappurtati wkoll 3,915-il mewt, b'1,943 minnhom kienu irġiel filwaqt li 1,972 kienu nisa. Dan jimmarka żieda ta’ 3.5% fl-imwiet meta mqabbel mal-2022, peress li ż-żieda tissarraf għal 132 mewt aktar. Barra minn hekk l-imwiet tan-nisa żdiedu b’136 mara meta mqabbla mas-sena ta’ qabel, filwaqt li l-imwiet tal-irġiel żdiedu b’erba’ darbiet.
L-aġenzija nnutat li fost l-ismijiet l-aktar popolari għas-subien kien hemm Matteo, Noah, Luca u Jack, filwaqt li l-ismijiet ta’ bniet l-aktar popolari kienu Emma, Valentina, Julia u Nina. Hawnhekk intqal li għat-tieni sena konsekuttiva, Ġanni u Luċija kienu l-aktar ismijiet popolari.
Skont Identità, fl-2023 ġew irreġistrati 2,036 tieġ, li jfisser tnaqqis ta’ 201 tieġ meta mqabbel mas-sena ta’ qabel. Ħadd minn dawn ma kienu unjonijiet ċivili. Intant, kien hemm 36 każ ta’ koabitazzjoni meta mqabbla mal-31 reġistrati fl-2022.
B’kollox, ir-Reġistru Pubbliku ħareġ 68,987 ċertifikat li jvarjaw minn ċertifikati ta’ twelid, mewt, żwieġ u unjoni ċivili. Minn dawn, 57% (39,217) ġew ipproċessati online, filwaqt li 29,770 ġew ipproċessati fl-uffiċċju tar-Reġistru Pubbliku fil-Marsa. 52 miċ-ċertifikati kienu għall-koabitazzjoni.
