Owen Bonnici | Il-qalb

Kieku l-Partit Laburista kellu jkun bniedem, l-ugwaljanza tkun il-qalb ta’ dan il-bniedem-partit. 

Jien nimmilita fil-Partit Laburista għax nemmen b’konvinzjoni tal-azzar li l-persuni kollha għandu jkollhom dritt jirrealizzaw il-massimu tal-potenzjal tagħhom.   Jien nimmilita fil-Partit Laburista għaliex nemmen b’konvinzjoni tal-azzar li l-persuni huma maħluqa ugwali iżda mhux identiċi.  Għax kollha ugwali imma mhux identiċi jfisser li kull persuna għandha l-aspirazzjoni u l-prekondizzjonijiet fil-ħajja tiegħu jew tagħha u dmirna hu li noffru l-opportunitajiet diversi skont il-ħtiġijiet u l-abbilitajiet partikolari tal-persuni. 

Aħna rridu nkunu dawk li naddattaw b’għaqal u ħsieb is-sistemi għall-ħtiġijiet tan-nies u mhux bil-maqlub jekk verament irridu nkunu nersqu mhux biss lejn l-ugwaljanza imma lejn l-ekwità. 

Nimmilita fil-Partit Laburista għaliex it-tfal kollha li jgħixu f’pajjiżna għandu jkollhom l-opportunitajiet kollha, mogħtija skont il-ħtiġijiet u abbilitajiet differenti tagħhom, biex isiru parti mis-soċjetà u jilħqu l-milja tal-potenzjal tagħhom. 

Nimmilita fil-Partit laburista għaliex nemmen b’qalbi kollha li kull persuna għandu jkollha aċċess ugwali li tinseġ il-ħajja tiegħu jew tagħha indipendentement mill-ġeneru, etniċita’, reliġjon, orjentazzjoni sesswali, diżabbilita’, background soċjali jew abbilta’ ekonomika. 

Għalhekk isegwi li bħala soċjeta’ rridu nfarrku l-barrieri u l-inugwaljanzi li jċaħħdu lin-nies, imqar jekk persuna waħda, mil-liberta’ li jilhqu x-xewqat tagħhom għal ħajjithom.  

L-għan prinċipali u ewlieni f’dan kollu hi l-mobbilita’ soċjali li għandha tingħata lil kulħadd.  Biex dan isir irridu niġġieldu kull forma ta’ diskriminazzjoni, kemm dik sfaċċata u kif ukoll dik sottili.  Ħadd m’għandu jiġi trattat inġustament jew b’mod li ma jixraqx. 

L-ugwaljanza tal-ġeneri hi prijorita’ kbira għall-Partit Laburista u nemmen li dan hu l-iktar moviment f’pajjiżna li kapaċi jwettaqha.   

Tifhmu għalhekk għaliex il-portafoll tal-Ugwaljanza li ngħata r-responsabbilita’ tiegħu lili ftit tal-jiem ilu qed nidħol għalih b’sens qawwi ta’ umilta’ u konsapevolezza tal-importanza straordinarja tiegħu għat-twettiq fil-prattika ta’ dak kollu li nemmen fih politikament. 

Din hi opportunita’ straordinarja li nwettqu flimkien fil-prattika dak li nemmnu fih biex pajjiżna jinbidel għall-aħjar. 

Kuntrarjament għal dak li qed isir fil-bqija tal-kontinent, id-demokrazija soċjal demokratika f’pajjiżna hi b’saħħitha u għada qed tikber ma’ kull jum li jgħaddi.  Aħna ma ġralniex bħall-pajjiżi Nordiċi fejn il-partiti soċjal-demokratiċi jew ma jiksbux maġġoranza jew jiksbu biss maġġoranza relattiva. 

Li jfisser li aħna f’pożizzjoni aqwa minn partiti soċjal-demokratiċi oħra li nsaħħu l-ugwaljanza.    L-isfida tal-inugwaljanza ekonomika għal nies bħali li trabbew f’familji fejn il-ġenituri litteralment issallbu biex jgħallmu lil uliedhom tfisser ħafna ħafna. 

Kull fejn tħares fl-Ewropa ssib li l-inugwaljanza ekonomika fil-pajjiżi żviluppati qed tikber.  Taqra kemm taqra rapporti tal-IMF, OECD u oħrajn jgħidulek l-istess ħaġa.  Jekk xejn din hi raġuni għalfejn bniedem għandu jagħzel il-partiti soċjal-demokratiċi.  Pero’ dak argument ieħor għal darb’oħra. 

F’pajjiżna l-Partit Laburista fl-aħħar snin ta’ tmexxija ta’ Malta u Għawdex ġab tkabbir ekonomiku bla preċedent u ġid gdid li mbagħad tqassam b’mod li jimxu ‘l quddiem il-faxex kollha tas-soċjeta’ – mhux biss dawk l-iktar fil-bżonn imma anke l-hekk imsejħa middle class.  Staqsu lill-pensjonanti u jgħidulek bid-differenza straordinarja li Gvern Laburista ġab f’ħajjithom. 

Fl-eqqel ta’ pandemija l-Prim Ministru Robert Abela rnexxilu mhux biss – bis-saħħa ta’ deċiżjonijiet importanti u f’waqthom – isalva l-ħajjiet imma anke l-postijiet tax-xogħol.  Fl-eqqel ta’ pandemija l-Prim Ministru Robert Abela kabbar l-ekonomija, ħoloq iktar impiegi u naqqas il-qgħad f’livelli ta’ bla preċedent. 

Fl-eqqel ta’ pandemija l-Prim Ministru Robert Abela għamel baġit bla taxxi u diġà iddikjara li fil-baġit li jmiss m’humiex se jiżdiedu taxxi ġodda. 

Dan il-Gvern il-prinċipji soċjal demokratiċi ma jitkellimx biss dwarhom, imma jwettaqhom fil-prattika. 

Dan hu wkoll Gvern progressista u riformista li jemmen fil-ħtieġa li nbiddlu, ntejbu u nkomplu ndaħħlu riforma wara l-oħra.  Wettaqna ħafna u għandna l-għatx u r-rieda li nkomplu ntejbu u nirriformaw. 

Fuq quddiemnett hemm riformi kruċjali bħal dawk tal-pussess sempliċi u użu responsabbli tal-kannabis, u s-sensibilizzazzjoni tal-liġjiet tal-prostituzzjoni.  Irridu li f’pajjiżna ndaħħlu bażi legali soda ta’ ugwaljanza u non-diskriminazzjoni li tkun tant b’saħħitha li tispira pajjiżi oħra fl-Ewropa u ‘l hinn.  

L-awtur Joseph E. Stiglitz , li fil-kitbiet tiegħu daħħal żiffa ta’ arja friska fil-ħsieb ta’ min jemmen li fl-ugwaljanza hemm il-futur tas-sostenibbilita’ tat-tkabbir ekonomiku u soċjali ta’ pajjiż sħiħ jgħid bla tlaqlieq li l-agħar ħaġa li tista’ tiġri f’pajjiż hu li jkun hemm żewġ socjetajiet fl-istess ħin – soċjeta’ ta’ dawk li għandhom u soċjeta’ distinta ta’ dawk li m’għandhomx li ma jitkellmux bejniethom u li ma jafux lil xulxin. 

L-ekonomisti taw ukoll isem lil din is-sitwazzjoni: ekonomija duwalistika.  L-ugwaljanza hi dik li taċċerta li kulħadd ikollu l-ikbar opportunitaà biex, flok jiffoka biex jieħu l-ġid ta’ ħaddieħor, jipparteċipa biex joħloq il-ġid. 

L-ugwaljanza hi l-qalb tħabbat tal-Partit Laburista u l-Gvern.