Valletta jirritornaw għar-rebħ

Valletta rritornaw għar-rebħ meta b’wirja konvinċenti għelbu lil Tarxien Rainbows bl-iskor ta’ 2-1. Tarxien Rainbows kellhom lill-kowċ Clive Mizzi sospiż hekk kif dan serva żewġ logħbiet sospensjoni waqt li Valletta kellhom lill-assistent kowċ Gilbert Agius sospiż hekk kif huwa qed iservi sospensjoni ta’ sena.  Il-Beltin fetħu l-iskor wara biss 2 minuti meta minn kross ta’ Vandelannoite, daħal tajjeb Denni Rocha dos Santos li permezz ta’ xutt b’saħħtu spara fix-xibka. Fit-22 minuta Nafti ra l-freekick insidjuż tiegħu jgħaddi ftit barrra. 

Iżda fis-57 minuta, Nafti kellu jsib ix-xibka għal darb’oħra minn freekick mill-isbaħ li ma ta l-ebda ċans lill-goalkeeper Vella li bħas-soltu kellu logħba tajba. Fis-67 minuta Valletta resqu viċin li jkomplu l-marġni tal-iskor iżda Vella laqa’ tajjeb minn xuttijiet konsekuttivi ta’ Mifsud Triganza, Agius u Denni. Ir-Rainbows ħolqu l-periklu fis-70 minuta iżda kellu jkun il-goalkeeper żagħżugħ ta’ Valletta Yenz Cini li jimpedixxi lil Jorge Santos Silva milli jsib ix-xibka. 

Finalment Tarxien Rainbows irnexxielhom isibu x-xibka fit-88 minuta permezz ta’ daqqa ta’ ras ta’ Marko Potezica iżda dan kellu jkun tard wisq għalihom biex jaspiraw li jirbħu almenu punt minn din il-logħba. 

Valletta Cini, Agius, Briffa, Mifsud Triganza (Zammit 73’), Reyes Sanchez, Barry (Azzopardi 76’), Bajada, Rocha dos Santos, Vandelannoite, Nafti (Cremona 86’), Dimech

Tarxien R. Vella, Mamo, Caruana (Zahra 68’), Lopez Alcantara, Agius, Potezica, Ciantar (Nagaoka 78’), Menendez Hevia, Pulo (Vella 78’), Mifsud, Santos Silva

Referee Paul Caruana