Għalfejn ikkunsidrajt li toħroġ għal din il-kariga?
Qabel ikkunsidrajt li nikkontesta għal din il-kariga, lanqas biss kelli l-iċken ħsieb, u dan sa riċenti. Kien biss wara intervista li saritli fuq F Living daqs ġimgħa u nofs ilu li bidlitli x-xenarju kollu. Immedjatament bdew jikkuntattjawni ammont mhux żgħir ta’ delegati tal-Partit Laburista li komplew jiżdiedu kuljum. Magħhom imbagħad, żdiedu wkoll xi ministri u deputati. Kien bl-insistenza ta’ dawn il-ħafna li mbagħad staqsejt lili nnifsi “għalfejn?”, “x’kien qed jiġri eżatt?” Wara li ħsibt u xtarrejt fil-fond, tkellimt sew mal-familja, u nies oħrajn qrib tiegħi, iddeċidejt li nilqa’ s-sejħa li kienu qed jagħmluli dawn in-nies tal-“Partit”.
Jidher ċar li għandek backing mid-delegati. Joseph Muscat qed itik l-appoġġ ukoll, veru?
Fil-politika qatt ma jkun hemm xejn ċar qabel ma jivvutaw in-nies. F’dan il-każ, id-delegati. Hemmhekk imbagħad tkun tista’ titkellem biċ-ċar kif jitħabbar ir-riżultat. Joseph Muscat ma naf li ddikjara mkien lil min se jkun qed jappoġġja fl-elezzjonijiet interni tal-Partit Laburista u hekk għandu jibqa’ jagħmel sa meta jaslu dawn l-elezzjonijiet, f’nofs Settembru li ġej.
Jidher ċar ukoll li l-mexxej tal-Partit Laburista Robert Abela mhux eċitat bl-interess tiegħek f’din il-kariga. Kif timmaġina li taħdem ma’ Abela jekk m’intomx 100% kompatibbli?
Bil-kontra. Minn fejn toħroġ li l-mexxej tal-PL Robert Abela mhux eċitat bil-kandidatura tiegħi? Allaħares naslu f’punt fejn il-mexxej juri, biex nuża kliemek, xi eċitament għal kandidat u mhux għall-kumplament tal-kandidati l-oħrajn kollha. L-interess tal-Partit Laburista ma jitlobx dawn l-affarijiet u allaħares isir hekk. Qatt ma rajt nuqqas ta’ kompatibbiltà mal-mexxej tal-PL Robert Abela u għaldaqstant m’hemm l-ebda kwistjoni fuq hekk. Li kieku kien il-każ, ma kienx ikun hemm dawk il-ħafna li semmejtlek iħeġġuni biex nikkontesta.
X’tixtieq tbiddel fil-partit?
Aktar milli tibdil, jien insejjaħlu tiġdid. Kull partit politiku jgħaddi minn fażijiet ta’ tiġdid skont iċ-ċirkostanzi. L-aħħar tiġdid sostanzjali li sar fil-PL kien fl-2008 u l-2009-10 meta l-PL kien għadu fl-oppożizzjoni. Issa, wara 11-il sena ta’ Gvern Laburista, jinħass ċar li l-PL għandu bżonn jiġġedded, jimtela b’aktar enerġija, iżomm aħjar il-kuntatt mal-fergħat kollha tiegħu, jagħti aktar widen lid-delegati tal-konferenza, u joħloq aktar diskussjoni fl-istrutturi kollha tiegħu li permezz tagħhom il-partit joħloq politika ġdida għall-bżonnijiet ġodda, reali tal-lum, fosthom, imma mhux biss, il-kwistjoni tal-over population li jistħoqqilha diskussjoni serja fit-tul ibbażata fuq riċerka ta’ esperti apposta li mbagħad tmur għad-diskussjoni fl-eżekuttiv nazzjonali tal-PL. L-istess diskussjoni trid issir fuq pjan ta’ viżjoni għal pajjiżna għall-5/10 snin li ġejjin fuq bosta oqsma importanti għal pajjiżna, fosthom is-saħħa, l-enerġija, u l-ambjent. Dan hu parti mit-tiġdid li għandu bżonn bħalissa l-Partit Laburista.
Hawn min qed jgħid li l-elezzjoni tiegħek twassal għal telfa sigura għall-PL. X’tirrispondi?
B’kull rispett. Jien għal kariga waħda qed nikkontesta ta, mhux għall-karigi kollha f’daqqa tal-PL.
Il-Partit Laburista mhux uċuħ ġodda għandu bżonn?
Il-Partit Laburista ma jarax uċuħ. Dik inħalliha għall-Partit Nazzjonalista, jiddilettaw ħafna biha. Sadanittant, il-PL għandu bżonn lil kulħadd. Għalija ħadd mhu għar-rimi.
Inti semmejt li l-pożizzjoni ta’ CEO tal-partit għandha tiġi mibdula għal dik ta’ Segretarju Ġenerali. Għalfejn?
M’għedtx hekk. Għedt li wasal iż-żmien li l-PL jerġa’ jkollu l-post ta’ Segretarju Ġenerali. In-nuqqas ta’ din il-kariga issa qed jinħass sew, anzi ħafna.
X’effett ħallew il-korruzzjoni, l-iskandli tal-Vitals, tal-Panama, u l-qtil ta’ Caruana Galizia fuq il-Partit Laburista?
Taqta’ l-inkjesta Vitals, il-każijiet l-oħrajn li semmejt kollha ġew qabel l-elezzjoni ġenerali. Dawk l-elezzjonijiet ġenerali kollha ntrebħu mill-PL b’maġġoranzi kbar ħafna. Anzi, l-akbar fl-istorja mill-Indipendenza ’l hawn.
Għalfejn tiddefendi lil Joseph Muscat?
Jien dejjem iddefendejt bil-kbir lil kull mexxej li kellu l-PL u hekk għandu jkun. Joseph Muscat wieħed minnhom. Jien konsistenti dejjem u kullimkien.
X’inhuma l-veduti tiegħek fuq Robert Abela?
Robert Abela hu l-mexxej tiegħi, u lejh għandi stima u rispett. Tant, li nittama li wara dawn l-elezzjonijiet, u jekk inkun elett, inkunu nistgħu naħdmu eqreb ta’ xulxin fl-interess tal-Partit Laburista u l-pajjiż kollu kemm hu.
