Bħala sindku, x’inhu l-ikbar inkwiet tiegħek? X’inhi l-ikbar sfida għall-kostitwenti tiegħek?
L-akbar inkwiet tiegħi hija s-sikurezza fil-lokalità. Matul is-sajf f’parti mil-lokalità jkollna ammont ta’ vandaliżmu u storbju matul il-lejl, filwaqt li f’partijiet oħra għandna problemi oħra ta’ sigurtà. Inkwiet ieħor kbir li għandi huwa ż-żieda qawwija ta’ appartamenti li qed jinkrew fuq bażi ta’ short let. Il-biża’ tiegħi ġejja mill-fatt li jekk dawn jibqgħu jiżdiedu b’dan ir-ritmu qawwi, il-lokalità tispiċċa estensjoni ta’ Paceville. Ilna nistaqsu biex isir carrying capacity exercise tal-lokalità, iżda għadna ma wasalna mkien.
Il-Kunsill tiegħek kif javviċina l-iżvilupp urban filwaqt li jippreserva l-wirt u l-ambjent tal-lokalità?
Il-lokalità ma tantx għandha wirt fis-sens illi din il-lokalità bdiet tinbena fis-sebgħinijiet u llum qiegħda fit-tieni fażi ta’ kostruzzjoni fis-sens li qed jitwaqqgħu d-djar biex jinbnew appartamenti. L-ambjent fil-lokalità ġie abbużat u stuprat u hija ħasra li f’lokalità tant ‘moderna’ biex ngħidu hekk, l-awtoritajiet ma ħadux ħsieb biex tinbena lokalità b’enfasi qawwija fuq l-ambjent. Fil-lokalità m’għandniex art pubblika ħlief erba’ ġonna żgħar. M’għandniex spazji miftuħa u lanqas faċilitajiet sportivi. Kull roqgħa qed tiġi sfruttata mingħajr ebda kas lill-ambjent. Il-ġonna tad-djar saru xafts u l-ġnien ta’ quddiem sar ċappa konkos! Il-Kunsill qiegħed attent ħafna biex jara li kulma jinbena jkun skont il-policies u għal dan il-għan għandna perit li jivverifika kull applikazzjoni ta’ żvilupp li jkun hemm fil-lokalità. Li għandna fil-lokalità huma tliet widien u qegħdin attenti ħafna biex ma jsirx żvilupp fihom.
Taħseb li l-lokalità tiegħek għandha biżżejjed spazji miftuħa għar-residenti?
Spazji miftuħa huma l-akbar nuqqas tal-lokalità. Kif diġà għedt, kulma għandna huma erba’ ġonna żgħar li għall-popolazzjoni li qiegħda dejjem tikber fl-ammont ta’ nies, kemm bħala residenti, kif ukoll bħala turisti, mhumiex biżżejjed. M’għandniex imqar pjazza!
Fis-snin li ġejjin, x’għandha tkun il-prijorità tal-lokalità tiegħek? Kif tixtieq tara l-lokalità tiegħek tipprogressa fil-ħames snin li ġejjin?
Għal dawn l-aħħar tnax-il sena, il-Kunsill ilu jaħdem biex jikkonvinċi lill-Gvern biex għalqa li hemm biswit il-Kunsill Lokali tinxtara mingħand il-privat. Din tibqa’ bħala spazju miftuħ/pjazza fil-waqt li taħt l-art ikollna Ċentru Reġjonali tal-Arti u l-Kultura fejn kull forma ta’ arti tiġi mgħallma u esebita. Iltqajt u ddiskutejt ma nafx ma kemm-il ministru u segretarju parlamentari, inkluż il-PM, imma naħseb li għadna ’l bogħod. Jekk din l-art tinbena tkun ir-rovina tal-lokalità. Ta’ min jinnota li l-Partit Nazzjonalista kkommetta li din l-art tixtara minn gvern Nazzjonalista.
“Ma jistax ikun li ma jkollniex biżżejjed flus biex nagħmlu major patching fit-toroq u nsewwu l-bankini!”
Xi proġetti ppjanati hemm għal-lokalità tiegħek fil-futur qarib?
Għandna diversi proġetti ta’ tisbiħ. Dalwaqt nibdew it-tieni fażi ta’ tisbiħ ta’ Ġnien Maurice Caruana Curran. Flimkien ma’ Project Green għandna proġett ta’ tisbiħ fi Triq is-Swieqi. Ix-xogħol għandu jibda dalwaqt. Għandna proġett ta’ tisbiħ fi Triq l-Ibraġ. Għandna wkoll proġett ta’ Vjal Kulħadd. Intant se nkomplu naħdmu biex inpoġġu kemm nistgħu planters biex niżirgħu s sigar.
Xi tħoss li huwa nieqes mil-lokalità tiegħek li tixtieq tipprovdi lir-residenti?
Kif għedt qabel, nixtieq spazji miftuħa, u nixtieq li nagħtu identità lil-lokalità u din tkun marbuta mal-Arti u l-Kultura.
Issib biżżejjed għajnuna mill-awtoritajiet fl-isfidi li taffaċċja bħala sindku?
Sfortunatament tul l-aħħar snin, il-Kunsilli Lokali ngħataw il-ġenb u żżarmaw mir-responsabbiltajiet il-kbar. Ġejna dipendenti mill-istat u l-ħin kollu nitkarrbu u nittallbu għall-għajnuniet bażiċi ngħidu aħna l-manutenzjoni tat-toroq u l-bankini. Dan mhux sew.
Bidliet leġiżlattivi reċenti naqqsu l-età minima għas-sindki għal sittax-il sena. Dan kif kellu impatt fuq il-Kunsill tiegħek, u x’inhi l-perspettiva tiegħek dwar l-involviment taż-żgħażagħ fil-governanza lokali?
Dan it-tibdil ma affettwax lill-Kunsill tagħna għax ma kellna l-ebda kandidat ta’ sittax-il sena. Nixtieq ħafna li nara aktar involviment taż-żgħażagħ fil-Kunsill tagħna u nassigurak illi qed nagħmel minn kollox biex dan iseħħ.
L-Uffiċċju Nazzjonali tal-Verifika rrapporta li sittax-il kunsill lokali temmew l-2023 b’kapital tax-xogħol negattiv, li jindika instabbiltà finanzjarja potenzjali. X’miżuri qed jiġu implimentati biex jiġi żgurat li l-Kunsill tiegħek iżomm status finanzjarju b’saħħtu u jikkonforma mar-regolamenti finanzjarji?
Il-finanzi huma problema kbira ħafna. Sa ftit tas-snin ilu ma kellniex problemi finanzjarji. Iżda llum dan il-qasam sar uġigħ ta’ ras kbira. Kwalunkwe servizz jew prodott li jixtri l-Kunsill ogħla immens fil-waqt li l-allokazzjoni annwali tal-Kunsill żdiedet bil-karawett. Mhux qed ngħid li għandu jkollna flus għar-rimi, imma ma jistax ikun li ma jkollniex biżżejjed flus biex nagħmlu major patching fit-toroq u nsewwu l-bankini!
X’kienet l-aktar parti ta’ sodisfazzjon mir-rwol tiegħek bħala sindku s’issa?
Din domanda tassew diffiċli. Jien bniedem li qatt ma nikkuntenta ruħi u dejjem irrid nagħmel aktar. Qatt ma naħseb fuq ilbieraħ jew fil-passat u nhewden fuq li ġej u fuq li ma rnexxilix nagħmel. Matul l-aħħar snin għamilna ħafna u ħafna. Din lokalità li m’għandhiex każini jew għaqdiet jew Festa tal-ebda forma. Għalhekk dak kollu li jiġi organizzat irid isir permess tal-Kunsill Lokali. Għamilna ħafna biex inkabbru s-sens ta’ komunità. Għad fadlilna ħafna x’nagħmlu u qed naqdfu. Bdejna Swieqi Fest, li hija attività annwali ta’ kultura u sports mifruxa fuq tlett ijiem matul Settembru, bdejna Ġieħ is-Swieqi, norganizzaw ħafna attivitajiet għal active agers u ħarġiet kulturali. Qed nagħtu enfasi fuq l-ambjent u introduċejna ħafna planters fil-kantunieri ta’ diversi toroq. Naħseb li l-akbar sodisfazzjon tiegħi s’issa hija l-komunikazzjoni mar-residenti.
