X’inhuma l-ikbar sfidi li qed tesperjenzaw bħalissa?
Waħda mill-akbar sfidi li qed inħossu bħalissa hija n-nuqqas ta’ spazju allokat minn fejn nistgħu noperaw u nipproċessaw l-iskart marittimu li niġbru waqt xogħolna.
Kif tirreklutaw, tħarrġu, u żżommu lill-voluntiera?
Kull min jixtieq jikkontribwixxi jista’ jingħaqad magħna waqt il-cleanups ta’ kull xahar li jkunu miftuħin għall-pubbliku. Waqt dawn l-avvenimenti, it-tim tagħna jipprovdi struzzjonijiet sabiex ikun aċċertat li l-voluntiera jafu x’qed jagħmlu. L-iżjed ħaġa importanti hija kif aħna naħdmu mal-voluntiera. Huma jfissru kollox għall-organizzazzjoni tagħna u mingħajrhom, ma nkunu nistgħu nagħmlu xejn. Aħna nittrattawhom kif irriduhom jittrattawna.
Kemm hemm nies li għadhom lesti jiddedikaw ħinhom għall-għaqdiet soċjali?
Hemm ħafna nies, imma wieħed irid jolqothom, isir jaf x’inhu għal qalbhom u kif din tirrelata mal-kawża tiegħek.
L-ammont ta’ żgħażagħ li qed jissieħbu magħkom qed jonqos jew jiżdied?
Qiegħed jiżdied ... l-iżjed minħabba programmi ta’ volontarjat rikjesti mill-iskola bħas-SOK u l-SRP. Sfortunatament iż-żgħażagħ mhumiex lesti jaħdmu magħna fit-tul. Hemm ċerta apatija li qed tagħmilha iżjed diffiċli għall-individwi ddedikati li jridu jinvolvu ruħhom.
Tista’ taqsam storja jew eżempju wieħed ta’ kif l-NGO ħalliet impatt tanġibbli?
Mill-2018 s’issa, neħħejna 180 tunnellata skart minn qiegħ il-baħar u mill-kosta. Qed naraw żoni li jibqgħu nodfa u dan ifisser li qed naħdmu f’żoni tajba.
X’tip ta’ appoġġ (finanzjarju, riżorsi umani, bidliet fil-politika) jgħin lill-organizzazzjoni tagħkom tikber?
Post iddedikat u fondi jistgħu jagħmlu differenza kbira. Dawn jgħinuna nikbru, nagħtu iżjed appoġġ lill-voluntiera u lill-isponsors, waqt li nippożizzjonaw lil Malta bħala waħda mill-aħjar pajjiżi fil-ġlieda kontra l-iskart marittimu.
Kif tikkollaboraw ma’ NGOs oħra, korpi governattivi, jew negozji?
Aħna niffukaw fuq kollaborazzjonijiet fejn kulħadd jibbenefika. La l-iskart jiġi ġġenerat minn kulħadd, aħna nippruvaw naħdmu ma’ kulħadd li huwa ġenwinament lest li jikkontribwixxi ħinu u xogħlu. L-aħjar kollaborazzjonijiet huma dawk prattiċi u li fihom jibbenefika kulħadd.
Kemm hu faċli ssibu għajnuna jew koperazzjoni mill-Gvern jew mill-entitajiet?
Kultant vera diffiċli. Aħna niffukaw iżjed fuq kif nistgħu nedukaw dipartimenti tal-Gvern u nikkollaboraw fejn hu possibbli sabiex nagħmlu bidla ikbar.
X’inhuma xi kunċetti żbaljati li għandhom in-nies dwar xogħolkom?
Ħafna nies jassumu li aħna kemm nitfaċċaw għall-cleanups, imma fil-verità, dak huwa biss terz ta’ xogħolna. Il-biċċa l-kbira ta’ xogħolna jikkonsisti f’loġistika, ippjanar, edukazzjoni u attiviżmu. Kunċett żbaljat ieħor huwa li aħna nagħmlu kollox full time, meta fil-verità, aħna kollha voluntiera b’xogħol filgħodu u x-xogħol li nagħmlu hawn joħdilna l-parti kbira mill-ħin personali tagħna.
Taħseb li hemm nuqqas ta’ interess jew nuqqas t’għarfien lejn għaqdiet bħalkom?
Iva ... għax x’jitla’ fuq il-midja qiegħed gradwalment jinbidel u aħna rridu niġġieldu sabiex insemmgħu leħinna kontra ditti b’budgets kbar.
Kieku tista’ tbiddel ħaġa waħda dwar is-settur tal-NGOs f’Malta xi tkun?
Iżjed opportunitajiet ta’ finanzjar b’inqas burokrazija, u iżjed kollaborazzjoni ma’ dipartimenti tal-Gvern.
Madwar dawn l-aħħar ħames snin, rajtu bidla kbira fil-qasam kif toperaw?
Iva, kbirna ħafna u qed naraw il-Gvern, il-kunsilli lokali, u l-kumpaniji privati ħadu passi kbar ’il quddiem, u l-pajjiż qiegħed f’pożizzjoni aħjar minn meta bdejna. Il-pajjiż qiegħed f’pożizzjoni ħafna aħjar. Rajna wkoll iżjed organizzazzjonijiet bħal ‘Rota’ li komplew it-tradizzjoni tal-isem.